Libri “Mësojmë shqip në diasporë” përfshihet në listën e materialeve mësimore në Gjermani
Nga OraNews Përditësimi i fundit 5 Maj 2026, 13:49
Një zhvillim i rëndësishëm është shënuar në drejtim të mbështetjes së mësimit të gjuhës shqipe në diasporë, veçanërisht në North Rhine-Westphalia, ku mësimi plotësues i shqipes është i organizuar.
Ambasada e Republikës së Shqipërisë në Gjermani, njoftoi se libri “Mësojmë shqip në diasporë” është përfshirë zyrtarisht në listën e materialeve mësimore për nxënësit shqiptarë në Gjermani, për nivelet II dhe III të mësimnxënies, nga shtëpia botuese Weyel Verlag.
Ky botim vjen si një instrument i rëndësishëm didaktik, i hartuar në mënyrë kronologjike dhe i përshtatur me temat dhe programet mësimore përkatëse.
Ai synon të lehtësojë procesin e të nxënit të gjuhës shqipe për fëmijët dhe të rinjtë shqiptarë që jetojnë jashtë vendit.
Teksti kontribuon drejtpërdrejt në forcimin e mësimit të gjuhës amtare në diasporë, duke ndihmuar në ruajtjen dhe transmetimin e identitetit kulturor dhe gjuhësor ndër breza.
Përfshirja e tij në programet zyrtare konsiderohet një hap konkret drejt konsolidimit të mëtejshëm të mësimit të shqipes në sistemet arsimore të vendeve pritëse.
