MODRIÇ OP*ROHET PAS FRAKTURËS/ Mesfushori kroat pritet të mungojë në fazën vendimtare të sezonit.
Nga OraNews Përditësimi i fundit 28 Prill 2026, 12:02
Luka Modriç është operuar pas një dëmtimi në fytyrë gjatë një ndeshjeje me Milanin. Mesfushori kroat pritet të mungojë në fazën vendimtare të sezonit.
Një dëmtim i rëndë ka goditur Milanin në një moment vendimtar të sezonit, pasi mesfushori Luka Modriç ka pësuar frakturë në kockën zigomatike të majtë dhe i është nënshtruar ndërhyrjes kirurgjikale.
Lajmi u konfirmua nga klubi kuqezi, i cili bëri të ditur se lojtari kroat u dëmtua gjatë një përplasjeje të pavullnetshme në fushë, teksa tentonte të godiste topin me kokë dhe u godit nga Manuel Locatelli.
Incidenti ndodhi gjatë një aksioni loje, ku Modriç u detyrua të largohej menjëherë nga fusha për shkak të dhimbjeve. Ekzaminimet mjekësore zbuluan një frakturë komplekse në pjesën e majtë të fytyrës, duke bërë të domosdoshëm ndërhyrjen kirurgjikale në një kohë të shkurtër. Operacioni u krye në klinikën “La Madonnina” në Milano nga një ekip i specializuar mjekësh, nën drejtimin e doktor Luca Autelitano, në prani të stafit mjekësor të klubit.
Sipas komunikatës zyrtare, ndërhyrja rezultoi e suksesshme dhe lojtari ndodhet në gjendje të stabilizuar, ndërsa pritet një periudhë rikuperimi që do të përcaktojë edhe kohën e kthimit të tij në fushë. Klubi i Milanit i uroi një shërim të shpejtë mesfushorit, duke theksuar rëndësinë e rikthimit të tij jo vetëm për ekipin, por edhe për angazhimet ndërkombëtare të ardhshme.
Dëmtimi i Modriç vjen në një fazë kritike të kampionatit, kur skuadra është e angazhuar në garën për objektivat sezonalë. Mungesa e tij pritet të ndikojë në balancën e ekipit në mesfushë, ndërsa trajneri Massimiliano Allegri do të duhet të gjejë alternativa për të përballuar ndeshjet e mbetura. Mbetet për t’u parë se sa do të zgjasë rikuperimi dhe nëse lojtari do të jetë gati për eventet e rëndësishme që e presin në vijim.
