McFarlane e rikthen Chelsea te fitorja: "Tani ndjehem i lehtësuar. Kaq mund të them!"...
Nga OraNews Përditësimi i fundit 27 Prill 2026, 17:21
Enzo Fernández është njeriu i momentit në universin e Chelseat! Me një gjuajtje me kokë nga mesfushori argjentinas, pas një krosi nga lojtari portugez Pedro Neto, Chelsea arriti në finalen e Kupës FA për të 17-ën herë, e para që nga viti 2022.
I shënuar në Wembley në minutën e 23-të, goli i amerikanojugorit rezultoi i vetmi në fitoren 1-0 ndaj Leeds në gjysmëfinale.
I ulur në stol të mërkurën, pas shkarkimit të Liam Rosenior, trajneri i përkohshëm Calum McFarlane kaloi një pasdite të paharrueshme! Chelsea do të përballet me Man.Cityn e Pep Guardiolës në finalen e 16 majit, e cila mund të jetë epilogu perfekt i këtij lloj historie ‘Hirushjeje’ për Calum McFarlane.
Trajneri 40-vjeçar anglez ishte i kënaqur që kishte (ri)filluar me këmbën e djathtë (ai tashmë e kishte drejtuar ekipin e Stamford Bridge për dy ndeshje në janar). "Lehtësim! Kjo është fjala e duhur për të shprehur atë që ndiej.
Ne ishim të sigurt sepse kishim punuar mirë gjatë tre ditëve të fundit, por kurrë nuk i dihet. Nuk është hera e parë që kam trajnuar këtë skuadër. E bëra pak kohë më parë për një javë. Kështu që e dija se në çfarë po futesha.
Tani është edhe më e lehtë sepse kam një marrëdhënie me lojtarët. Kam punuar me ta për tre ose katër muaj, pasi isha tashmë pjesë e stafit. E dija se çfarë u nevojitej psikologjikisht", tha Calum McFarlane, duke parë përpara finales në Wembley:
"Do të hyjmë me një plan, duke e ditur se janë në formë të mirë. Do të jetë një sfidë e madhe. Zakonisht e rrisim nivelin tonë, gjë që ndodhi kundër PSG-së në Kupën e Botës për Klube. Gjithçka ka të bëjë me karakterin tonë."
