"Berisha dhe Xhafaj bashkë në një rrjet interesash"/ Salianji: Pa pastruar opozitën, nuk fitohet Shqipëria, të largohen të dy
Nga OraNews Përditësimi i fundit 17 Prill 2026, 14:04
Ish-deputeti Ervin Salianji ka reaguar me një postim në rrjetet sociale, ku akuzon për lidhje të forta politike mes Sali Berisha dhe Fatmir Xhafaj.
Sipas tij, mbrojtja që Berisha i bëri Xhafajt tregon se mes tyre ekziston një bashkëpunim i hershëm dhe i qëndrueshëm.
Ai e lidh këtë me çështje që kanë të bëjnë me ndërtimet dhe vendimmarrjet gjatë kohës kur Xhafaj ka qenë në detyrë, duke përmendur edhe përfshirjen e familjarëve në procese që lidhen me lejet e ndërtimit.
Në reagim, Salianji ngre shqetësime edhe për mungesën e hetimeve pasurore dhe për heshtjen politike që, sipas tij, shoqëron këto raste.
Ai përmend gjithashtu përfitime nga licenca dhe projekte të ndryshme, duke i cilësuar si pjesë e një rrjeti më të gjerë interesash.
Në të njëjtin qëndrim, ai akuzon edhe Edi Rama dhe Erion Veliaj për përgjegjësi në çështje që lidhen me ndërtimet dhe korrupsionin.
Salianji e cilëson situatën si një përballje të dyfishtë politike, ku sipas tij duhet ndryshim si në qeveri ashtu edhe në opozitë. Ai shton se pa ndryshime të brendshme në opozitë, nuk mund të ketë ndryshim real në vend.
