Fati tragjik i 25-vjeçares, Lezha ndez qirinj në kujtim të Xhuana Nikollajt! E afërmja: Zgjodhi mos t’u bëhej barrë familjarëve
Nga OraNews Përditësimi i fundit 13 Mars 2026, 20:35
Dhjetëra qytetarë janë mbledhur mbrëmjen e së premtes në qytetin e Lezhës për të nderuar kujtimin e 25-vjeçares Xhuana Nikollaj, humbja tragjike e së cilës ka tronditur komunitetin.
Homazhet u zhvilluan rreth orës 18:00, ku të afërm, miq dhe të rinj ndezën qirinj dhe vendosën lule në kujtim të saj, duke shprehur dhimbjen dhe solidaritetin me familjen.
Në një atmosferë të rënduar dhe mes lotësh, qytetarët qëndruan për disa minuta në heshtje në shenjë respekti për jetën e re që u ndërpre shumë herët. Disa prej të pranishmëve kërkuan gjithashtu zbardhjen e plotë të rrethanave të ngjarjes dhe vendosjen e drejtësisë.
Ngjarja ka prekur thellë opinionin publik në Lezhë, ku 25-vjeçarja njihej nga shumë banorë të qytetit. Homazhet u kthyen në një moment dhimbjeje dhe reflektimi për komunitetin, i cili shprehu mbështetje për familjen e saj.
Mes qirinjve të ndezur dhe emocioneve të forta, qyteti kujtoi një jetë të re që u shua para kohe, ndërsa familjarët dhe qytetarët presin që drejtësia të japë përgjigje për këtë humbje të rëndë.
Pas homazheve të mbajtura te “Obelisku” në Lezhë për 25-vjeçaren Xhuana Nikollaj, një e afërme e saj rrëfeu se vajza kishte planifikuar të fillonte një punë të re në Tiranë vetëm një ditë pas ngjarjes tragjike.
Sipas saj, kur familjarët zbuluan se ish-partneri i Xhuanës, Eraldo Fizi, kishte ushtruar dhunë ndaj saj, ata ndërhynë menjëherë dhe e morën Xhuanën në shtëpi për ta mbrojtur. Pas kësaj, ajo vendosi të zhvendosej në Tiranë për të nisur një jetë të re dhe për të filluar punën e re.
E afërmja shtoi se Xhuana nuk kishte shfaqur shqetësime të dukshme dhe se familja mendonte se ndarja e saj nga Fizi tre muaj më parë mund të kishte shkaktuar depresion, por nuk ishte kështu. Ajo jetoi me shoqe në Tiranë dhe kur shprehu shqetësime ndaj familjes së saj, ata u përkujdesën menjëherë, duke e marrë dhe duke i siguruar mbrojtje.
“Pastaj shkoi në Tiranë për të jetuar aty. Një ditë më pas do të fillonte punë. Po e shikonte jetën me një këndvështrim tjetër. Kam 1 mijë mesazhe për gratë dhe vajzat që të mos heshtin, por të flasin. Ka ndryshuar koha, tani janë të lira,” tha e afërmja e saj, duke theksuar rëndësinë e ndërgjegjësimit për dhunën ndaj grave dhe vajzave.
