SHUHET DËSHMITARI I WATERGATE! Alexander Butterfield zbuloi sistemin sekret të përgjimeve të Nixon

Nga Lili Saraçi Përditësimi i fundit 10 Mars 2026, 15:35

Ka ndërruar jetë në moshën 99-vjeçare Alexander Butterfield, ish-ndihmës i lartë i presidentit amerikan Richard Nixon, dëshmia e të cilit zbuloi ekzistencën e një sistemi sekret përgjimesh në Shtëpinë e Bardhë dhe ndryshoi rrjedhën e hetimit për skandalin Watergate.

Alexander Butterfield, ish-ndihmës i lartë i presidentit amerikan Richard Nixon dhe figura kyçe në zbardhjen e skandalit Watergate, ka ndërruar jetë në moshën 99-vjeçare. Lajmi u konfirmua nga bashkëshortja e tij dhe nga ish-këshilltari i Shtëpisë së Bardhë, John Dean.

Butterfield u bë i njohur në historinë politike amerikane për një dëshmi vendimtare në vitin 1973, kur zbuloi para Komitetit të Senatit për Watergate se në Shtëpinë e Bardhë ekzistonte një sistem sekret regjistrimi të bisedave të presidentit.

Ky sistem ishte instaluar në vitin 1971 me kërkesë të Nixon dhe përfshinte mikrofonë në Zyrën Ovale dhe në disa hapësira të tjera ku zhvilloheshin takime të rëndësishme.

Për një kohë të gjatë, Butterfield ishte ndër të paktët zyrtarë që dinin për ekzistencën e këtij sistemi. Por gjatë dëshmisë së tij në Senat, ai konfirmoi drejtpërdrejt dyshimet e hetuesve për përgjime në Shtëpinë e Bardhë, duke hapur një kapitull të ri në hetimin e skandalit Watergate.

Pas këtij zbulimi, prokurori special kërkoi me urdhër gjykate kasetat e regjistrimeve. Refuzimi fillestar i Nixon për t’i dorëzuar ato çoi në krizën e njohur si “Masakra e Natës së së Shtunës”, kur dy zyrtarë të lartë të Departamentit të Drejtësisë dhanë dorëheqjen në shenjë proteste.

Kasetat u publikuan më vonë dhe përmbanin prova që lidhën drejtpërdrejt Nixon me përpjekjet për të mbuluar vjedhjen në selinë e Partisë Demokratike, çka çoi në dorëheqjen e tij në vitin 1974.

Butterfield nuk u akuzua kurrë për përfshirje në skandal, por roli i tij në zbulimin e sistemit të përgjimeve e bëri një figurë qendrore në një nga krizat më të mëdha politike në historinë moderne të Shteteve të Bashkuara.

Pas largimit nga administrata federale në vitin 1975, ai vazhdoi karrierën në sektorin privat dhe jetoi për shumë vite në Kaliforni.