Rusia "ngre tonet" ndaj NATO-s: Çdo prani perëndimore në Ukrainë shihet si kërcënim
Nga OraNews Përditësimi i fundit 4 Shkurt 2026, 16:06
Rusia e konsideron vendosjen e trupave të NATO-s në territorin e Ukrainës si krejtësisht të papranueshme, duke paralajmëruar se çdo forcë perëndimore e pranishme në terren do të trajtohet si objektiv legjitim ushtarak.
Ky qëndrim vjen në përgjigje të diskutimeve të fundit në kuadër të aleancës për mundësinë e dërgimit të forcave nga i ashtuquajturi “koalicion i të vullnetshmëve” në Ukrainë.
Zëdhënësja e Ministrisë së Jashtme ruse, Maria Zakharova, reagoi ndaj komenteve të Sekretarit të Përgjithshëm të NATO-s, Mark Rutte, lidhur me planet për përfshirje më të drejtpërdrejtë të disa vendeve aleate në terren.
Sipas saj, prania e trupave perëndimore në tokën ukrainase, nën çfarëdo flamuri apo mandati, përbën kërcënim për sigurinë e Rusisë dhe do të ketë pasoja serioze në planin ushtarak.
Nga Moska u përsërit se kundërshtimi ndaj një skenari të tillë ka qenë i vazhdueshëm dhe se çdo hap që rrit përfshirjen e NATO-s në konflikt rrezikon përshkallëzim të mëtejshëm të situatës.
Në të njëjtën kohë, pala ruse la të kuptohet se kërkon zgjidhje përmes kanaleve politike dhe diplomatike, duke përmendur se janë propozuar edhe opsione të ndryshme për menaxhimin e krizës.
Deklaratat e fundit vijnë në një moment të ndjeshëm të zhvillimeve në frontin diplomatik dhe ushtarak, ndërsa diskutimet për rolin e NATO-s në Ukrainë po intensifikohen, duke rritur tensionet mes Rusisë dhe Perëndimit.
