Rrjeti kr*minal me 12 të arrestuar në Greqi, DETAJET e operacionit policor, ja si ranë në grackën e bluve pjesëtarët
Nga OraNews Përditësimi i fundit 22 Dhjetor 2025, 09:10
Zbulime të reja po dalin në dritë lidhur me aktivitetin e një rrjeti të strukturuar trafikimi droge që vepronte në Atikë, ku përfshiheshin edhe të mitur. Sipas autoriteteve, rrjeti funksiononte me hierarki të qartë, disiplinë të rreptë dhe përdorim sistematik të kërcënimeve dhe dhunës, ndërsa shitjet e drogës kryheshin edhe brenda shkollave.
Rasti u zbulua pas një operacioni të Policisë Helenike të zhvilluar të enjten, më 18 dhjetor, gjatë të cilit u arrestuan 12 persona, gjashtë prej tyre të mitur. Paralelisht, policia ka identifikuar edhe shtatë persona të tjerë që shpallen në kërkim.
Hierarkia dhe organizimi i rrjetit
Sipas dosjes hetimore, drejtuesi i grupit dyshohet të jetë një 20-vjeçar i huaj me nofkën “Fratelo”, ndërsa zëvendësi i tij ishte një 19-vjeçar grek i njohur si “Zoumbo”. Anëtarë të tjerë të rrjetit vepronin me pseudonime si “Kontos”, “Pipis” dhe “Nitse”.
Një park në zonën e Patission ishte zgjedhur si pikë kryesore takimi dhe koordinimi, i koduar nga anëtarët me emrin “Kitsou”, ku jepeshin udhëzime dhe caktoheshin detyrat.
Shitje përmes rrjeteve sociale dhe çmime të përcaktuara
Komunikimi mes anëtarëve realizohej kryesisht përmes Instagram dhe aplikacionit Signal. Sipas hetimeve, droga e shitur ishte kryesisht kanabis dhe kokainë, me çmime që varionin rreth 10 euro për gram kanabis dhe 50 euro për gram kokainë.
Hetimi nisi pas një ankese dhe vijoi me përgjime telefonike, vëzhgim fizik dhe analizë të të dhënave, duke çuar në identifikimin e të paktën 263 transaksioneve droge.
Veçanërisht shqetësuese janë dialogët e regjistruar mes drejtuesve të rrjetit dhe anëtarëve të mitur, ku dokumentohen kërcënime, shantazhe dhe urdhra për zbatim të menjëhershëm, edhe gjatë orarit shkollor.
Në disa biseda, drejtuesit kërkojnë dorëzimin e parave nën kërcënimin e dhunës, ndërsa në të tjera negociohen sasi dhe çmime droge, madje edhe me “oferta speciale”.
Sipas hetimit, rrjeti zbatonte rregulla të ashpra disiplinore. Dënimet përfshinin gjoba, rrahje dhe akte poshtërimi, të cilat në disa raste regjistroheshin dhe publikoheshin në rrjete sociale. Në materiale të tilla, të mitur shfaqen duke u keqtrajtuar dhe kërcënuar për të shërbyer si “shembull” për të tjerët.
Autoritetet zbuluan se droga shpërndahej në shkolla në zonat e Nea Filadelfias, Nea Halkidonës dhe Ano Patisias, si dhe në zonat përreth tyre. Në një rast, dy të mitur transportuan drogë gjatë një ekskursioni shkollor në Hania.
Gjithashtu, në bisedat e përgjuara, anëtarët e rrjetit diskutojnë mënyra për pastrimin e parave përmes kompanive të basteve, me synimin që të ardhurat e paligjshme të paraqiteshin si fitime nga lojërat e fatit.
Ndaj të arrestuarve është ngritur çështje penale për krijim dhe pjesëmarrje në organizatë kriminale me qëllim trafikimin e drogës dhe përfitim financiar të paligjshëm. Po ashtu, u arrestuan pesë persona që kishin përgjegjësi prindërore për të miturit, të akuzuar për neglizhencë në mbikëqyrje.
