Abuzimet me tenderat e AKSHI-t/ Policia nuk e lë vetëm as zv.drejtoreshën, Hava Delibashi mbërrin në SPAK
Nga OraNews Përditësimi i fundit 18 Dhjetor 2025, 11:56
Drejtoresha e AKSHI-t, Mirlinda Karçanaj, është paraqitur sot në Gjykatën e Krimeve të Rënda, e shoqëruar nga makina e policisë, pasi ndaj saj është caktuar masa e “arrestit në shtëpi”.
Menjëherë pas saj, në SPAK ka mbërritur edhe zv.drejtorja Hava Delibashi, e cila ka të njëjtën masë sigurie si Karçanaj.
Kujtojmë se Prokuroria e Posaçme ka lëshuar 8 masa sigurie në lidhje me dyshime për abuzime me tenderat e AKSHI. Është firmosur “Arrest me burg” për Ergys Agasin dhe Ermal Beqirin. Ndërkohë “Pezullim nga detyra” dhe “Ndalim për të dalë jashtë vendit” është lëshuar për Erion Ismailin. Andis Papa, Gëzim Hoxha, Rogers Rryta janë personat ndaj të cilëve është vendosur masa e sigurisë “Ndalim për të dalë jashtë vendit”.
Nga hetimet e SPAK rezultoi se grupi kriminal rrëmbeu për disa orë biznesmenin Gerond Meçe, të cilin përmes kërcënimin e detyruan të heqë dorë nga ankimet për disa procedura tenderuese. Me ndihmën e drejtueseve të AKSHTI, kriteret e tenderave përshtateshin në mënyrë të tillë që fitoheshin nga kompanitë e Ermal Beqirit, ndërsa dyshohet se grupi ka pastruar miliona euro.
