Theu masën e "arrestit shtëpiak" dhe mashtroi një grua duke u prezantuar si agjent imobiliar, policia arreston 34-vjeçarin
Nga OraNews Përditësimi i fundit 12 Dhjetor 2025, 11:13
Policia ka arrestuar shtetasin e identifikuar me iniciale A.G., 34 vjeç për mashtrim dhe thyerje të masës së sigurisë "arrest shtëpie".
34-vjeçari ka mashtruar një grua duke iu prezantuar si agjent imobilar dhe i garantoi që do i gjente një banesë. Gruaja ka dhënë një shumë parash për banesën me qera që ka kërkuar ndërkohë kjo e fundit nuk ka marrë asnjë shërbim.
Blutë ndërkohë kanë ushtruar kontroll në automjetin e shtetasit A.G., dhe kanë gjetur armë sportive dhe një palë targa të vjedhura.
Njoftimi i policisë:
Tiranë/Finalizohet operacioni policor i koduar “Implikimi”.
Theu masën e sigurisë dhe mashtroi, duke u prezantuar si agjent imobiliar, arrestohet 34-vjeçari që lëvizte me pistoletë sportive, në automjet, dhe posedonte një palë targa të vjedhura.
Sekuestrohen arma sportive dhe targat.
Si rezultat i administrimit të shpejtë të kallëzimit të një shtetaseje, se ishte mashtruar nga një shtetas që i ishte prezantuar si agjent imobiliar, dhe për këtë arsye i kishte dhënë një shumë parash për t’i gjetur një banesë me qira, specialistët e Seksionit për Hetimin e Krimeve Ekonomiko-Financiare, në bashkëpunim me shërbimet e Forcës së Posaçme “Shqiponja”, finalizuan operacionin “Implikimi”.
Gjatë operacionit u identifikua, u kap dhe u vu në pranga shtetasi A. G., 34 vjeç, banues në Tiranë.
Nga kontrolli në automjetin me të cilin shtetasi A. G. lëvizte në rrugën “Kastriotët”, në momentin e kapjes, u gjet 1 armë sportive (pistoletë) që mbahej pa leje, ndërsa nga kontrolli në banesën e këtij shtetasi u gjet një palë targa që nga verifikimet rezultojnë të vjedhura.
Nga verifikimet e mëtejshme rezultoi se 34-vjeçari ishte aktualisht me masë sigurie “Arrest në shtëpi”, për veprën penale “Dhuna në familje”.
Materialet procedurale iu referuan Prokurorisë së Tiranës, për veprime të mëtejshme.
