Lura, magjia dimërore/ Turistët e huaj zbulojnë parkun shqiptar në stinën dimërore

Nga OraNews Përditësimi i fundit 10 Dhjetor 2025, 18:11

Parku Kombëtar i Lurës po kthehet në një nga destinacionet më të kërkuara të turizmit dimëror në Shqipëri, duke tërhequr vizitorë nga Evropa e më gjerë.

Peizazhet e mbuluara me borë, liqenet akullnajore dhe qetësia e natyrës po e bëjnë Lurën një magnet për turistët që kërkojnë përvojë të pastër malore.

Në zemër të Dibrës, Parku Kombëtar i Lurës po shndërrohet në një ndër destinacionet më të veçanta dimërore të Shqipërisë.

Peizazhet e kristalta, të mbuluara nga dëbora, kanë tërhequr turistë nga e gjithë bota,  të cilët kërkojnë qetësi, natyrë të paprekur dhe një përvojë të rrallë në mes të maleve.

Sipas “Travel and Tour Ëorld”, Lura po shihet gjithnjë e më shumë si një “parajsë dimri”, ku liqenet akullnajore dhe pyjet e dendur krijojnë një atmosferë magjike gjatë muajve të ftohtë.

Turistët vijnë për të ecur në shtegje panoramike, për të fotografuar natyrën e virgjër dhe për të shijuar një arratisje të qetë larg zhurmës urbane.

Vetëm 20 kilometra nga Peshkopia dhe rreth 3 orë nga Tirana, parku mbulon mbi 1,200 hektarë terren malor, liqene dhe pyje  duke ofruar aventurë për çdo vizitor, nga ecja deri te kampingu dimëror.

Më tej artikulli shkruan se atmosfera e qetë dhe mungesa e turmave e bëjnë Lurën ideale për kampinguesit që kërkojnë lidhje të drejtpërdrejtë me natyrën.

Shumë vizitorë vendosin t’i kalojnë orët pranë liqeneve të ngrira, duke shijuar një piknik dimëror ose thjesht pamjet e rralla të Alpeve Shqiptare.

Peizazhet e Lurës kanë tërhequr edhe vëmendjen e kryeministrit Edi Rama, i cili ndau në rrjetet sociale imazhe të parkut të mbuluar me borë, duke vënë theksin te potenciali i tij turistik.

Me rritjen e vizitorëve, autoritetet dhe organizatat lokale po punojnë për të ruajtur ekosistemet e brishta të parkut, duke promovuar turizmin e qëndrueshëm dhe mbrojtjen e faunës së egër.

Me bukurinë e tij të papërshkrueshme dhe qetësinë unike dimërore, Parku Kombëtar i Lurës po kthehet në një destinacion që duhet vizituar patjetër. Një arratisje e vërtetë në zemër të Shqipërisë ku natyra shkëlqen në formën e saj më të pastër.