ARRATISJA NË ITALI – SKEMA DHE MJETET/ Dalin pamjet mjeteve që përdori Taulant Toma për t’u larguar nga burgu

Nga OraNews Përditësimi i fundit 8 Dhjetor 2025, 14:43

Sharrë hekuri, çelës “papagall”, bishta fshese të bashkuar me shirit ngjitës, çarçafë të lidhur me kujdes dhe një grep metalik i improvizuar.

Këto janë disa nga mjetet që Taulant Toma përdori për t’u arratisur nga burgu i sigurisë së lartë në Milano — arratisja e katërt në historinë e tij, që i ka sjellë nofkën “magjistari i arratisjeve”.

Hetimet paraprake zbuluan se Toma kishte siguruar të paktën 21 mjete, shumë prej tyre të përshtatura nga ai vetë brenda burgut.

Me një sharrë hekuri ai preu hekurat e dritares, me “papagallin” hoqi pjesët metalike mbajtëse, ndërsa litarin e përgatitur prej çarçafësh rreth 4 metra e përdori për të zbritur në oborr.

Kur gardianët hynë në qeli, gjetën një shufër të prerë dhe çarçafët e lidhur fort në mënyrë profesionale.

Për grepin me të cilin u ngjit në murin 6 metra të lartë, ai kishte ndërtuar një shufër prej disa bishtave fshese të ngjitur me shirit, me majë metalike për t’u kapur në mur.

ARRATISJA NË ITALI – SKEMA DHE MJETET/ Dalin pamjet mjeteve që

Kamerat e sigurisë e regjistrojnë duke u larguar në këmbë rreth orës 06:30 të mëngjesit, ndërsa alarmi nuk ra dhe stafi i reduktuar nuk vuri re asgjë deri në orën 8.

Taulant Toma, i dënuar deri në vitin 2048, mbetet një nga figurat më të njohura për arratisje në historinë e burgjeve europiane — një i dënuar që kudo ka qenë i mbyllur, ka gjetur mënyrën për të dalë.

Në vitin 2013, në burgun e Lantin në Belgjikë, Toma u arratis përmes një plani edhe më të guximshëm: të burgosurit krijuan një piramidë njerëzore për ta ngritur drejt murit, ndërsa një shpërthim i simuluar hutoi rojat.

Edhe më herët, në vitin 2013, Toma ishte arratisur nga burgu i Parmës me të njëjtin model: sharrë për hekurat, çarçafë për zbritjen dhe largim përtej perimetrit.

Debutimin e tij në arratisje e ka në vitin 2009, në burgun e Ternit, ku 25-vjeçari i atëhershëm, i dënuar për grabitje zyrash postare në gjithë Italinë e Veriut, preu hekurat dhe u arratis për t’u kapur vetëm pas dy muajsh