Mediu në OSBE: Kina, Irani dhe Koreja e Veriut, shtyllat ndihmëse të agresionit rus, kërcënim serioz për sigurinë evropiane
Nga OraNews Përditësimi i fundit 1 Korrik 2025, 13:29
Kryetari i Partisë Republikane, Fatmir Mediu, në fjalën e tij gjatë punimeve të Asamblesë Parlamentare të OSBE-së, ka denoncuar mbështetjen që Kina, Irani dhe Koreja e Veriut i kanë dhënë agresionit rus ndaj Ukrainës, duke e cilësuar këtë si një kërcënim të drejtpërdrejtë për paqen dhe sigurinë në Evropë.
Në mbështetje të një amendamenti të paraqitur nga Senatori amerikan Cornyn, Mediu theksoi se ky ndryshim e bën më të plotë kuadrin e analizës për agresionin rus, duke përfshirë jo vetëm aleancën me Korenë e Veriut, por edhe bashkëpunimin me Kinën dhe Iranin.
“Kina është partneri më i fuqishëm i Rusisë. Ajo ka mbështetur ekonominë ruse dhe ka ndihmuar në anashkalimin e sanksioneve, duke i siguruar Kremlinit burime jetike për vijimin e luftës,” deklaroi Mediu.
Ai shtoi se edhe Irani ka kontribuar ndjeshëm në këtë agresion, duke furnizuar Rusinë me qindra dronë vdekjeprurës që janë përdorur për të goditur civilët dhe infrastrukturën kritike në Ukrainë.
Mediu përmendi gjithashtu rolin e goditjeve të SHBA-së ndaj objekteve bërthamore të Iranit, duke i cilësuar si veprime që kanë kontribuar në stabilitetin jo vetëm në Lindjen e Mesme, por edhe në Evropë, duke i dërguar një mesazh të qartë ndëshkues edhe Rusisë.
FATMIR MEDIU: Si mbështetje për këtë amendament, para së gjithash dua të falënderoj Senatorin Cornyn për këtë amendament, i cili e bën shumë më të plotë propozimin. Sepse pa përfshirë atë që zoti Corning shtoi, siç e dini, do të ishte tërësisht i paplotë. Ky amendament shton një referencë për bashkëpunimin e Rusisë me Republikën Popullore të Kinës dhe Republikën Islamike të Iranit në luftën e saj kundër Ukrainës, gjë që meriton të përmendet krahas bashkëpunimit të saj me Korenë e Veriut.
Kina është partneri më i fuqishëm i Rusisë, ashtu si edhe Republika Islamike e Iranit, të cilat po minojnë jo vetëm sigurinë dhe luftën për lirinë e Ukrainës, por gjithashtu po minojnë sigurinë e Evropës. Kina jo vetëm që ka mbyllur sytë ndaj mizorive të luftës së Putinit kundër Ukrainës, por ka mbështetur ekonominë dhe zinxhirët e furnizimit të Rusisë, duke minuar sanksionet dhe duke siguruar që Rusia të vazhdojë të ketë akses në para dhe materiale të domosdoshme për pushtimin e saj.
Ndërkohë, Irani e ka furnizuar Rusinë me qindra dronë vdekjeprurës që Kremlini i ka përdorur për të sulmuar civilët në Ukrainë, duke vrarë dhe gjymtuar njerëz të pafajshëm dhe duke shkatërruar infrastrukturë kritike.
Dua vetëm të shtoj se sulmi i SHBA-së ndaj objekteve bërthamore të Iranit ka ndihmuar jo vetëm në stabilitetin në Lindjen e Mesme, por edhe në Evropë, si dhe ka forcuar faktorin ndëshkues ndaj Rusisë në raport me Ukrainën. E përgëzoj reporterin për përfshirjen e referencës për mbështetjen e Rusisë nga Bjellorusia dhe Koreja e Veriut, dhe i bëj thirrje kolegëve të mi ta mbështesin këtë amendament për të pasqyruar më mirë pamjen e gjerë të ndihmës së huaj që Putini ka marrë për agresionin e tij. Jetojmë në një kohë kur duhet ta kuptojmë dhe të kemi një panoramë të plotë se çfarë përbën kërcënim jo vetëm për Ukrainën, por edhe për Evropën. Faleminderit!
