Grup pune për mbikëqyrjen e sjelljeve të partive politike me të dhënat personale të zgjedhësve
Nga OraNews Përditësimi i fundit 10 Prill 2025, 19:40
Komisioneri për të Drejtën e Informimit dhe Mbrojtjen e të Dhënave Personale, Besnik Dervishi zhvilloi një takim me shefin e Misionit të Zyrës së ODIHR-it në Tiranë, ambasadorin Lamberto Zannier.
Në fokus të këtij takimi ishte roli i Zyrës së Komisionerit në kuadër të procesit të zgjedhjeve parlamentare të 11 majit 2025.
Komisioneri Dervishi e informoi ambasadorin Zanier mbi hapat e ndërmarra nga Zyra e Komisionerit në kuadër të monitorimit të procesit zgjedhor, duke ngritur edhe një grup pune që mbikëqyr sjelljen e partive politike në raport me përpunimin e ligjshëm të të dhënave personale të zgjedhësve. Dervishi theksoi se deri tani pranë Zyrës së Komisionerit nuk janë paraqitur ankesa nga partitë politike apo nga qytetarët për cenimin e të dhënave personale.
Komisioneri Dervishi e njohu gjithashtu ambasadorin Zannier me deklaratën e përbashkët me Kryekomisionerin Shtetëror të Zgjedhjeve, “Mbi administrimin dhe përpunimin e të dhënave personale në kuadër të veprimtarisë zgjedhore”.
Dervishi e informoi shefin e Misionit të ODIHR edhe mbi kontributin që KDIMDP ka dhënë në lidhje me hartimin e akteve për procesin e votimit nga jashtë, për sistemin PER, etj.
Ambasadori Lamberto Zannier shprehu vlerësime për kontributin dhe rolin e Zyrës së Komisionerit për të Drejtën e Informimit dhe Mbrojtjen e të Dhënave Personale.
