Starmer mbështet Zelensky pasi Trump e quan udhëheqësin ukrainas “një diktator”
Nga OraNews Përditësimi i fundit 20 Shkurt 2025, 18:55
Kryeministri britanik, Keir Starmer mbështeti sot Volodymyr Zelensky gjatë një bisede telefonike – pasi presidenti i SHBA-së, Donald Trump e quajti presidentin ukrainas “një diktator pa Zgjedhje”.
Në bisedën e tij, kryeministri i Britanisë së Madhe i ofroi Zelensky mbështetjen e tij si lider i zgjedhur në mënyrë demokratike të Ukrainës dhe tha se ishte plotësisht e arsyeshme të pezulloheshin zgjedhjet gjatë kohës së luftës, siç bëri Britania e Madhe gjatë Luftës së Dytë Botërore”, sipas një zëdhënësi të “Downing Street”.
Reagimi i Starmer erdhi pas një luftë fjalësh midis Trump dhe Zelensky. Presidenti amerikan kritikoi dje homologun e tij ukrainas për shtyrjen e zgjedhjeve.
Zelensky u zgjodh president i Ukrainës në maj 2019. Zgjedhjet në Ukrainë ishin planifikuar të mbaheshin në vitin 2024, por ato nuk u zhvilluan si rezultat i vendosjes së ligjit të luftës.
Më herët, Zelensky tha se Trump po jetonte në një “hapësirë dezinformimi”.
Grindja midis dy liderëve vjen në një moment delikat në politikën globale pasi zyrtarët amerikanë dhe rusë u takuan për herë të parë në Riad, Arabi Saudite – për të filluar bisedimet që synojnë ndërmjetësimin e një marrëveshjeje paqeje në Ukrainë.
Starmer pritet të udhëtojë në Uashington javën e ardhshme për bisedime me Trump, për të diskutuar luftën në Ukrainë dhe sigurinë evropiane – në të njëjtën javë, presidenti francez Emmanuel Macron raportohet se do të shkojë në Shtëpinë e Bardhë.
Ky do të jetë takimi i parë mes Starmer dhe Trump – që nga ardhja e tij në detyrë si presidenti i SHBA-së në janar.
