''Nga 1 marsi, pensionistët do marrin bonusin e pranverës'', Rama: Ja kur do hapet tuneli i Murrizit
Nga OraNews Përditësimi i fundit 20 Shkurt 2025, 08:57
Kryeministri Rama gjatë komunikimit me ndjekësit u shpreh se se nga 1 marsi, pensionistët do mund të marrin bonusin e pranverës.
Ky fond tha Rama është 62 milionë euro.
“Bonusi është 62 milionë euro dhe për të gjithë që marrin deri në 200 euro pension, do jetë 100 euro dhe ata që marrim mbi 200 do marrin 50 euro.
Nga 1 marsi dhe në vijim, pensionistët do marrin bonusin e pranverës.
Do jetë i disponueshëm dhe nuk ka asnjë diskutim që ne themi atë që bëjmë dhe bëjmë atë që themi”, tha Rama.
Kryeministri i Shqipërisë, Edi Rama, gjatë komunikimit me ndjekësit në rrjetet sociale u ndal edhe tek Rruga e Arbrit ku pohoi se do të përfundojë në muajin mars.
Ai theksoi se punimet në Tunelin e Murrizit po shkojnë drejt fundit, ndërsa shtoi se gjeologjia e vështirë krijoi vonesa të shumta.
“Ndodh që nganjëherë të marrim më shumë kohë seç është parashikuar, si për shembull Rruga e Arbrit, por jo për shkak se i lëmë gjë mangët punës, por se të papriturat edhe ndodhin.
Gjeologjia e tunelit të Murrizit doli shumë më e ndërlikuar se ishte parashikuar nga studimet dhe jemi në kushtet kur po shkojmë drejt përfundimit pas një riarmatimi me një teknologji tjetër të të gjithë pjesëve të tunelit.
Besoj shumë se më në fund në mars do ta heqim edhe këtë sy të keq nga shpina, sepse realisht ai tunel na ka marrë shpirtin, por bashkë me pranverën do dalë dhe shpirti i keq nga tuneli dhe dibranët do shkojnë e vijnë me rrugën e hapur”, tha ai.
