Rusia ndalon eksportin e uraniumit të pasuruar në SHBA
Nga OraNews Përditësimi i fundit 18 Nëntor 2024, 19:23
Rusia ndaloi furnizimin me uranium të pasuruar për termocentralet bërthamore në Shtetet e Bashkuara të Amerikës dhe tani planifikon të lejojë eksportet vetëm në raste të jashtëzakonshme.
“Në fakt, është futur një ndalim eksporti”, tha zëdhënësi i Kremlinit Dmitry Peskov, sipas agjencive ruse të lajmeve.
”Shërbimi Federal i Rusisë për Kontrollin Teknik dhe Eksport mund të lejojë përjashtime, por vetëm nëse kjo është në interes të Moskës”, tha ai.
Në SHBA, rreth një e katërta e termocentraleve bërthamore marrin uranium të pasuruar nga Rusia për përdorim si lëndë djegëse.
Presidenti amerikan Joe Biden vendosi një ndalim për importin e uraniumit të pasuruar nga Rusia këtë vit si pjesë e sanksioneve kundër Moskës.
Megjithatë, parashikohen përjashtime në rast se SHBA-ja është e varur nga karburanti bërthamor nga Rusia.
Në shtator, presidenti rus Vladimir Putin udhëzoi autoritetet ruse të rishikojnë kufizimet e eksportit për lëndët e para të rëndësishme strategjike të vendit, duke përfshirë nikelin dhe titanin përveç uraniumit.
Marrëdhëniet ruse me SHBA-në janë në një pikë të ulët.
Moska është ankuar për sanksionet ndëshkuese perëndimore të vendosura në vazhdën e pushtimit rus në shkallë të plotë të Ukrainës.
Kremlini pretendon se sanksionet janë të paligjshme dhe ka vendosur vazhdimisht kundërsanksione kundër vendeve dhe kompanive perëndimore.
Rusia është një nga furnizuesit më të rëndësishëm në botë të uraniumit të pasuruar për funksionimin e termocentraleve bërthamore.
Ndërmarrja ruse e energjisë bërthamore ”Rosatom” njoftoi në Moskë se do të përmbushen kontratat e tjera të eksportit me 33 klientë në 14 vende.
”Rosatom” nuk dha ndonjë informacion specifik mbi eksportet në SHBA, por deklaroi se kompania ”Holding” mbulon rreth 17% të kërkesës globale për karburant bërthamor.
”Prodhimi i uraniumit arriti në 2 700 tonë vitin e kaluar”, sipas ”Rosatom”.
