“Dorëzohet” AKU: Nuk kemi dhoma frigoriferike. Ku shkon mishi i bllokuar nga inspektorët?
Nga Alketa Çeku Përditësimi i fundit 19 Korrik 2024, 12:35
Televizioni Ora News ka publikuar skandalin e inspektoreve të AKU të cilët mishin e sekuestruar në tregje dhe dyqane e kanë dërguar në fabrika sallami.
Por situata në institucionin e drejtuar nga Edmond Rrushi është më alarmante se kaq. Ky skandal mund të vijojë të përsëritet pasi Drejtoria Rajonale e AKU Tirane nuk posedon një dhomë frigoriferike që të shërbejë për ruajtjen e mishit të konfiskuar.
Tv Ora News i ka kërkuar informacion për këtë situate edhe AKU. Ky institucion na bën me dije se jo vetëm nuk kanë një dhomë frigoriferike për ruajtjen e mishit të konfiskuar por as nuk ka marrë me qira ambiente të tilla nga subjekte private.
Në kushte të tilla lind pyetja , ndër vite ku e çojnë inspektoret e AKU mishin që sekuestrojnë ne tregje dhe dyqane?
Ligjërisht ato nuk kanë asnjë vend ku ta dorëzojnë pasi AKU nuk disponon asnjë ambient për ruajtjen e mishit, deri ne fazën e groposjes ose asgjësimit.
Mungesa e një ambienti frigoriferik ku të bëhet dorëzimi me procesverbal lë të hapur mundësinë që mishi të dërgohet në subjekte të tjera private për tu ripërpunuar e me pas për tu hedhur në treg.
Teksa AKU mundohet t’i edukoje qytetarët me fushata ndërgjegjësuese për të kontrolluar ushqimin ka dështuar ne misionin e saj që t’i ofroje blerësve ushqime të sigurta, pasi mungesa e ambienteve frigoriferike ka lënë te hapur mundësinë e abuzimit.
