Vrasja e Gentian Bejtjas, lihen në burg Ilir Beqaraj dhe Edison Haxhiu. Avokati: Të arrestuarit s'kanë lidhje me ngjarjen
Nga OraNews Përditësimi i fundit 21 Mars 2024, 15:40
Ilir Beqaraj dhe Edison Haxhiu, të arrestuar për vrasjen e Gentjan Bejtjas janë paraqitur këtë të enjte në gjykatën penale.
Në përfundim të seances është vendosur masa “arrest në burg” për Ilir Beqaraj dhe Edison Haxhiu.
Ish-polici i Burgjeve, Gentian Bejtja u qëllua në banesën e tij me 15 mars 2024, në Larushk të Fushë Krujës.
I dyshuari kryesor për vrasjen e ish-policit të burgjeve Gentian Bejtja është Ilir Beqaraj, i cili rezulton me dy mbiemra të tjerë përkatësisht, Brahimi dhe Mançellari.
Edison Haxhiu dyshohet se u ka ardhur në ndihmë autorëve të largohen menjëherë pas ngjarjes duke ua vënë në dispozicion makinën e tij tip “Golf”.
Pas seancës foli edhe avokati i të dyshuarve i cili kërkoi të kryhej ekspertimi i GPS-it në makinë.
“Ne kërkojmë që të kryhet ekspertimi i GPS në makinë.
Të arrestuarit nuk kanë lidhje me ngjarjen.
Prokuroria nuk provoi që makina është e të arrestuarve.
Prokuroria nuk provon se kush ishte në mjetin me xhamat e zinj”, deklaroi avokati i dy të dyshuarve.
Dinamika si lëvizën autorët e dyshuar
Nga tërësia e veprimeve hetimore ka rezultuar se autorët janë afruar tek banesa e shtetasit Gentjan Bejtja me automjetin e markës “Land Rover Discover” me ngjyrë të zezë dhe pas kryerjes të vrasjes po me këtë automjet janë larguar në aksin rrugor Larushkë – Thumanë, pas kalimit të mbikalimit të Fushë Krujës, janë kthyer majtas dhe në fshatin Hasan kanë djegur automjetin e mësipërm.
Nga kryerja e veprimeve hetimore është vërtetuar se autorët janë larguar me një automjet tip “Golf” me ngjyrë të zezë, pa targë në pjesën e pasme, duke ndjekur intererarin nga vendi i djegies së automjetit në drejtim të rrugës kryesore Thumanë-Fushë Krujë, kanë devijuar djathtas në mbikalimin e Fushë Krujës dhe janë larguar në drejtim të fshatit Bubq, Krujë.
