Rama: Me ikjen e Beckenbauer shuhet një tjetër legjendë e gjallë e sportit më të dashur në botë
Nga OraNews Përditësimi i fundit 8 Janar 2024, 19:15
Kryeministri Edi Rama shprehu sot ngushëllimet për ndarjen nga jeta të legjendës së futbollit gjerman Franz Beckenbauer, duke e cilësuar si një valltar i dalë nga koreografitë e mjeshtrave të baletit modern.
Në një postim në rrjetet sociale Rama tha se me ikjen e tij shuhet një tjetër legjendë e gjallë e sportit më të dashur në botë.
“Kaiser Franz ishte si një valltar i dalë nga koreografitë e mjeshtrave të baletit modern në qendrën e mbrojtjes së Gjermanisë, ku ngriti kupën e botës e më pas, si një personazh i letërsisë gjermane në këmbë përpara stolit të Bundesmanschaft-it, kur e udhëhoqi Gjermaninë drejt një tjetër kupe të botës”, theksoi Rama
Kryeministri Rama u shpreh se “me ikjen e tij shuhet një tjetër legjendë e gjallë e sportit më të dashur në botë dhe shkëputet një tjetër copë e bukur e fëmijërisë sonë, atëherë kur futbolli ndërkombëtar ishte vetë bota në Shqipërinë e burgosur brenda mureve të komunizmit”.
Legjenda e futbollit botëror dhe gjerman Franz Beckenbauer ka vdekur në moshën 78-vjeçare. Beckenbauer ka luftuar vazhdimisht me probleme shëndetësore vitet e fundit.
