Pëllumbi: Askush s’e kishte parashikuar këtë lloj dhune, na rrezikohet jo vetëm puna në Komisione, por edhe siguria fizike
Nga OraNews Përditësimi i fundit 6 Nëntor 2023, 12:47
Deputeti socialist Arben pëllumbi në një prononcim për mediat nga ambientet brenda Kryesisë së Kuvendit deklaroi se jemi në një situatë e cila nuk lka ndodhur në Kuvendin e Shqipërisë.
“Pavarësisht fakteve se çfarë ngjarjesh kemi pasur në seanca plenare, këtu në këtë godinë nuk ka pasur tejkalime dhune. Në fakt javën e kaluar ju e patë se çfarë, ku u tentua të hyhet me forcë në zyrën e Kryetares së Kuvendit.
Në këto kushte Garda ka menduar që t’i japë një zgjidhje këtij problemi. Është e drejta e saj të gjykojë se cila është siguria më e mirë.
Ajo që është e rëndësishme të kuptoni është fakti që asnjë nga deputetët që nuk ishte i përjashtuar nuk u ndalua të hynte në ambientet e Kuvendit.
Por kur deputetët e papërjashtuar filluan të fusnin deputetët e përjashtuar në ambientet e Kuvendit, sigurisht që Garda për një moment ua mbylli derën.
Se ju po flisni sikur i bëjmë ne këto, sigurinë në ambientet e Kuvendit e ka Garda e Republikës, nuk vi këtu për t’u zënë me njeri. Jemi në kushtet e pamundësisë për të zhvilluar mbledhjet e komisioneve.
Sepse askush nuk ka marrë parasysh në hartimin e Rregullores së Kuvendit për të parashikuar këtë lloj dhune, duke rrezikuar jo vetëm aktivitetet e komisioneve, por edhe sigurinë tonë fizike.
Ku i janë mohuar të drejtat opozitës? E pse qenkan mohuar komisionet hetimore? Sepse janë në shkelje të ligjit, prandaj nuk janë lejuar. Asgjë nuk i është penguar opozitës”, u shpreh ligjvënësi socialist, Arben Pëllumbi.
