Suarez bashkohet me Mesin/ Inter Miami arrin marrëveshjen me Gremion për sulmuesin uruguaian
Nga Klaudio Pulaj Përditësimi i fundit 4 Nëntor 2023, 11:38
Luis Suarez pritet t'i bashkohet Leo Mesit te Inter Majemi. Mediet uruguajane raportojnë se klubi nga Florida ka arritur marrëveshjen me Gremion, për transferimin e sulmuesit drejt SHBA-ve.
Dyshja e famshme që trembte çdo kundërshtar që i dilte përballë dhe që shkëlqeu në Barcelonë, për disa sezone, pritet të ribashkohet sërish.
Bëhet fjalë për Luis Suarez dhe Lionel Messi. Sulmuesi uruguajian mund ti bashkohet Inter Miami-t, në janarin ose në verën e vitit të ardhshëm.
Lajmi bëhet i ditur nga prestigjiozja ‘ESPN’ në Uruguaj, e cila raporton se drejtuesit e ekipit nga Florida kanë arritur marrëveshjen me klubin brazilian të Gremio-s, për të marrë shërbimet e ‘El Pistoleros’.
36-vjeçari do të largohet nga klubi nga Porto Alegre në fund të sezonit në Serie A të Brazilit, që përfundon në dhjetor, pavarësisht se është vetëm në gjysmë të kontratës dy-vjeçare që nënshkroi në dhjetor të vitit të kaluar.
Marrëveshja për një kontratë një-vjeçare, me një opsion për rinovim për një vit të dytë, është rënë dakord me skuadrën nga Shtetet e Bashkuara të Amerikës dhe gjithçka që mbetet tani thuhet se është vetëm edhe nënshkrimi i kontratës.
Luis Suarez është golashënuesi më i mirë i Gremio-s, në këtë sezon, me 10 gola dhe 10 asistime në 31 ndeshje.
Ai është gjithashtu golashënuesi më i mirë i të gjitha kohërave i kombëtares uruguajane me 68 gola në 137 paraqitje.
Nëse transferimi kryhet, Suarez do të gjejë te Inter Miami edhe dy ish-shokët e tjetë te skuadra katalanase, Sergio Busquets dhe Jordi Alba.
