Dy viktima në 12 orë, aksidente fatale në Koplik e Belsh. 5 të plagosur në Fier
Nga OraNews Përditësimi i fundit 15 Tetor 2023, 15:02
Dy viktima dhe të paktën 5 të plagosur është bilanci i aksidenteve të shënuara orët e fundit në rrugët e vendit.
Dy viktima dhe disa të plagosur u shënuan në rrugët e vendit në harkun e 12 orëve.
Në Malësi të Madhe, një 77 vjeçar u përplas për vdekje nga një makinë që drejtohej nga një 24-vjeçar banues në Gostivar të Maqedonisë së Veriut!
Ngjarja u shënua rreth orës 05 40 minuta në aksin Shkodër – Koplik.
I moshuari sipas policisë po ecte në këmbë mori plagë të rënda të cilave nuk arriti tu mbijetojë. Drejtuesi i mjetit ndërkohë u ndalua nga Policia.
Më herët gjatë natës, një 37- vjeçare humbi jetën në një aksident në aksin Kuçovë-Belsh. Ai po udhëtonte si pasagjer në këtë makinë që drejtohej nga një 22-vjeçar.
Në këtë pikë të rrugës, shoferi humbi kontrollin dhe u përplas me barrierat e anësore.
Siç tregojnë pamjet, përplasja ka qenë e fortë pasi mbrojtëset metalike kanë tejshkuar mes përmes makinën.
Shoferi dhe një 14-vjeçar që udhëtonte po ashtu si pasagjer morën lëndime pa rrezik për jetën.
Ndërkohë 5 anëtarë të një familje mbetën të plagosur pasi makina me të cilën udhëtonin përfundoi jashtë rrugës në aksin Levan-Tepelenë.
Të plagosurit u dërguan për ndihmë mjekësore ndërsa raportohet se të gjithë janë jashtë rrezikut për jetën.
Policia e Fierit nisi punën për sqarimin e shkaqeve të aksidentit që u shënua pranë fshatit Buzëmadh.
