Ambasadori britanik në Kosovë: Gjuha shqipe është dëshmi e qëndrueshmërisë së një populli
Nga OraNews Përditësimi i fundit 14 Gusht 2023, 19:53
Seminari Ndërkombëtar për Gjuhën, Letërsinë dhe Kulturën Shqiptare ka hapur edicionin e 41-të të tij. “Shqipja në rrezik” dhe “Letërsia shqipe dhe interkulturalizmi” ishin temat që sipas folësve janë të domosdoshme për tu trajtuar.
Ambasadori britanik në Kosovë, Nicholas Abbott, iu drejtua të pranishmëve në gjuhën shqipe, duke theksuar rëndësinë e ruajtjes së saj.
“Në një epokë të karakterizuar nga globalizmi dhe përparimet teknologjike rëndësia e ruajtjes së gjuhëve dhe nxitjes së shkëmbimit kulturor nuk ka qenë kurrë më kritike. Gjuha shqipe me origjinë të saj të lartë dhe veçoritë gjuhësore unike është një dëshmi e qëndrueshmërisë dhe këmbënguljes së një populli. Megjithatë pikërisht kjo gjuhë po përballet me kërcënimet me zhdukje pasi forcat moderne dhe lidhjet globale po lënë në hije rëndësinë e saj. Ajo që rrezikojmë të humbasim nuk është thjesht një mjet komunikimi por një sferë e tërë letrare që kanë pasuruar kuptimin tonë kolektiv të përvojës njerëzore”,
Seminari Ndërkombëtar për Gjuhën, Letërsinë dhe Kulturën Shqiptare është themeluar në vitin 1974 pranë Fakultetit të Filologjisë.
