Qori: Kur partia vjen në pushtet, gangsterët bëhen deputetë, drejtorë e doganierë! Policët janë rrogëtarë të tyre
Nga OraNews Përditësimi i fundit 9 Korrik 2023, 17:35
Kreu i Lëvizjes Bashkë, Arlind Qori thotë se shqiptarët janë të frikësuar nga oligarkët, deputetët, gangsterët, sepse nuk janë të organizuar.
Ai thotë se në çdo lagje të Tiranës mund të gjesh lehtësisht nga një grup gangsterësh, të cilët ata nuk janë të fortë në vetvete. Por ata bëhen të fuqishëm pasi janë bashkëpunëtorë të partive politike, duke mposhtur popullin.
“Këta nuk janë gangsterë të zakondshëm. Janë gangsterë me mbiemër Rraja. Këta janë vëllezër dhe farefisi me mbiemrin Rraja, që është deputeti i partisë në pushtet, që voton ligjet që na qeverisin ne dhe që është një nga shtyllat e kësaj mënyrë qeverisje. Me thënë të drejtën, përtej Unazës së Vogël të Tiranës, në çdo lagje të mundshme të Shqipërisë ka nga një grup gangsterësh që kontrollojnë territorin. Këta nuk janë të fortë në vetvete. Janë bashkëpunëtorë të partive politike nga njëri spektër në tjetrin, nga qeveria në opozitë, nga qeveritarë të sotëm në qeveritarë të djeshëm.
Asnjë gangster në botë nuk është i fotë nëse nuk nuk kanë bashkëpunëtorë ministra, deputetë, kryeministra. Do thoni ju, ç’dreqin do ministri me deputetin? Këta na qeverisin sot dhe ata që na kanë qeverisur dje, mund të vijnë në pushtet vetëm nëpërmjet përkrahjes së gangsterëve, sepse gangsterët kur fillojnë fushatat elektorale, kërcënojnë qytetarët, shkojnë blejnë vota dhe në këmbim kur partia vjen në pushtet bëhen deputetë, drejtorë, doganierë, bëhen policë.
Këta qytetarë të shkretë që ishin rrahur, ishin rrahur se kishin denoncuar në polici. Policia ka detyrimin të mbrojë sekretin. Ama gangsterët e kishin marrë vesh brenda orës, sepse policët në Fushë-Krujë janë rrogëtarë të gangsterëve ose rrogëdhënës të gangsterëve. Ne si qytetarë jemi të çorganizuar, ne kemi frikë prej gangsterëve, prej politikave, e ne kemi frikë prej oligarkëve, për një arsye të thjeshtë; sepse ne jemi të çorganizuar, maksimumi jemi 3-4 vetë në një kafene dhe të turren me shkopinj dhe pistoleta, patjetër që të venë për fund. Nëse ne do organizoheshim, po dhe një organizim politik atëherë do ishim të fuqishëm dhe do ishin gangsterët që do iknin me vrap”.
