Rama: Negociatat kërkojnë kohën e tyre, por duhen më shumë fonde për Ballkanin

Nga OraNews Përditësimi i fundit 31 Maj 2023, 11:28

Kryeministri Edi Rama mori pjesë sot në panelin e diskutimit mbi Ballkanin “Open Roads: Balkans Back in Business”, që po zhvillohet në Sllovaki.

Në fjalën e mbajtur në këtë panel, Rama tha se për vendet e Ballkanit Perëndimor procesi i negociatave të anëtarësimit do të kërkojë kohë, ndërsa shprehu bindjen se ky proces nuk duhet nxituar dhe duhet të jetë sistematik dhe i konsoliduar.

Por, vijoi ai, “ne duhet të marrim diçka më shumë dhe diçka duhet të ndryshojë në marrëdhëniet mes BE-së dhe Ballkanit Perëndimor, nëse nuk duam ta shohim Ballkanin Perëndimor të kthehet pas sërish”.

Rama kujtoi situatën që ndodhi në Evropë dhe brenda shteteve të BE-së në përgjigje të krizës së madhe që goditi Evropën, pasi sipas tij, “kjo shpjegon atë hendek të jashtëzakonshëm mes shteteve anëtare të BE-së dhe vendeve të Ballkanit Perëndimor”.

Duke folur me gjuhën e shifrave, Rama tha se midis vitit 2020-2021 mes dy paketave shumë të mëdha që ishte Instrumenti për Rimëkëmbjen dhe Rezistencën e BE-së, 47,5 miliardë euro plus 672 miliardë euro për shtetet anëtare që dha BE, për të 6-ta vendet e Ballkanit Perëndimor u dhanë 1 miliard euro mes të cilave 500 milionë euro në grante dhe 500 milionë euro në hua.

“500 milionë euro në grante ishin mbështetje e drejtpërdrejtë për problemin tonë të përbashkët nga të cilat Shqipëria mori 85 milionë euro, që në fakt ishin rishpërndaje e fondeve të IPA-s. Ajo që duhet të merrnim nga fondet IPA për projekte të caktuara u riorientua nga ky buxhet. Nuk po them se nuk ishte gjë e mirë, por ishte rishpërndarje”, theksoi Rama.

Ndërkohë ai tha se dhënia e granteve nga BE për shtetet anëtare në Evropën Juglindore do të jetë 11-fish më e madhe krahasuar me Ballkanin Perëndimor.

“Nga fondet e IPA-s, që janë ato që marrim, 90% shkon për ndihmë teknike dhe 10% për investime, ndërkohë që fondet e synuara të kohezionit janë 92% investime dhe 0.3% ndihmë teknike”, tha Rama.

Sipas tij, “fondet e dhëna nga buxheti i BE-së midis 6 vende të Ballkanit Perëndimor krahasuar me shtetet anëtare janë 138 euro për qytetarë të Ballkanit Perëndimor dhe  4750 euro për qytetarët e BE-së. Kjo është situata ku gjendemi dhe arsyeja përse ne mendojmë se ky është një problem për jetë a vdekje”, shtoi Rama.