Dan Hutra pas vrasjeve dhe plagosjeve të grave në Paskuqan, Astir e Kamëz. Policia në këmbë për kapjen e tij
Nga OraNews Përditësimi i fundit 1 Mars 2023, 17:15
Tri gra u vranë dhe 3 të tjera u plagosën në tre skena të ndryshme krimi në Astir, Paskuqan dhe Kamëz këtë të mërkurë. I sapoliruari nga burgu Dan Hutra hyri në banesë dhe plagosi ish-gruan me të cilën kishte një vajzë 4 muajshe dhe ish- vjehrrën. Plumbat u morën jetën edhe dy grave të tjera të afërme të ish-gruas së autorit. Ndërkaq dyshohet se ka vrarë edhe një 31-vjeçare, me të vëllain e së cilës ishte konfliktuar në burg.
Tri gra u vranë dhe 3 të tjera u plagosën në 3 vendngjarje të ndryshme, me vetëm 1 autor të dyshuar, 40-vjeçarin Dan Hutra.
Pas kishte lënë qelinë 2 javë më parë, Hutra ka shkuar mesditën e të mërkurës në banesën e ish-të dashurës së tij, Marjana Gurakuqi, të cilën e ka plagosur me thikë dhe i ka vjedhur paratë.
Pas këtij momenti, ai dyshohet se është nisur drejt Paskuqanit, ku banonte ish-gruaja e tij Elena Hysa, me të cilën ka edhe një fëmijë 4 muajshe.
Aty ai ka hapur zjarr ndaj 4 grave. Plumbat i morën jetën dy prej tyre, Mevlute Hysës, motrës së ish-gruas si dhe Hasime Dafku, e fejuara së vëllait të ish-gruas.
Dy të tjerat Elena dhe Kujtime Hysa, nënë e bijë mbetën të plagosura.
Nga kjo skenë krimi autori është larguar me një mjet tip "Benz" me targa AA 551 UX.
Makina me të cilën u largua nga Paskuqani
Pak minuta më pas në polici është raportuar për tjetër vrasje në Bathore. 31-vjeçarja Etleva Kurti, ishte gjetur e pajetë në oborrin e banesës.
Pas verifikimeve, policia ka ngritur dyshimet se edhe për këtë vrasje autori është Dan Hutra. Ky i fundit ka pasur një konflikt në burg me të vëllain e viktimës, Vladimir Kurti.
Teksa policia vijon hetimet për të zbardhur të gjithë kronologjinë dhe motivet e këtyre ngjarjeve të rënda, një dëshmi tregon se kemi me një person të dhunshëm.
"E rrihte vajzën, ishte shumë e urtë dhe më ka ardhur keq për të. Erdhi shtatzënë te babai i saj, i lindi një vajzë dhe e ka 4 muajsh. Ajo tregonte se e dhunonte jo vetëm atë por gjithë familjen."
Pikërisht për shkak të dhunës që ai kishte ushtruar në familje, ish-gruaja e tij e Elena Hysa e pati denoncuar në polici.
Çfarë thotë Gjykata e Apelit për dënimin
Referuar interesimit të mediave, Gjykata e Apelit të Juridiksionit të Përgjithshëm, informon sa më poshtë:
Gjykata e Rrethit Gjyqësor Tiranë, ka zhvilluar gjykimin lidhur me zëvëndësimin e e masës së sigurimit “arrest në burg” me masën e sigurimit “detyrim paraqitje në policinë gjyqësore”, ndaj personit nën hetim shtetasit me iniciale Dan Hutra, i dyshuar për kryerjen e veprëse penale “Dhunë në familje”, parashikuar nga neni 130/a të Kodit Penal.
Me vendimin nr. 555/1 Akti, datë 09.0.2023 Gjykata e Rrethit Gjyqësor Tiranë, vendosi:
Rrëzimin e kërkesës me nr. 3356/1 Akti, datë 04.01.2023 me kërkues Dan Hutra.
Çështja në apel u shqyrtua mbi bazën e ankimit të bërë nga personi nën hetim Dan Hutra, i cili kërkoi ndryshimin e vendimit, zëvëndësimin e e masës së sigurimit nga “arrest në burg” në atë “detyrim paraqitje në policinë gjyqësore”.
Në përfundim të gjykimit, me vendimin nr. 66, datë 14.02.2023, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtare znj. Irida Kacerja, vendosi:
-Lënien në fuqi të vendimit nr. 3356/1 Akti, datë 09.01.2023 të Gjykatës së Rrethit Gjyqësor Tiranë.
Për vijueshmërinë e procesit të shtetasit Dan Hutra, në shkallë të tjera të gjykimit, Gjykata e Apelit të Juridiksionit të Përgjithshëm, nuk ka informacion.
