Berisha: Ai është Parlamenti i krimit monstruoz kushtetues, verbërisht vegël e Edi Ramës
Nga OraNews Përditësimi i fundit 12 Shkurt 2023, 19:07
Kryetari i Partisë Demokratike doli sot në selinë blu ku zhvilloi një takim me Kryetarët e Degëve të Tiranës, LDG dhe FRPD u shpreh se është nisur një revolucion ndaj regjimit të Ramës.
Berisha tha se edhe dje vizita te kuvendi pas protestës së opozitës ishte për të dhënë mesazhin se ai është parlamenti i krimit monstruoz kushtetues.
Berisha: Kemi nisur një revolucion ndaj regjimit më mafioz të Evropës, do të shmangim gjakderdhjen, do të firmosim fitoren. Askush të mos dyshojë për këtë. Një revolucion paqësor nuk është çështje e një dite, një proteste, e disa protestave. Është një proces, është një proces i qëndrueshëm mosbindje civile. E thotë Mahatma Gandi; në një revolucion mosbindja civile është i shenjtë. Por duhet ta kuptojnë të gjithë këtë mision. Duhet ti besojmë të gjithë këtij misioni.
Dje unë, bashkë me ju unë bëra një tur në simbolikën e tij. Institucioni i parë ishte parlamenti. Parlamenti është sot, totalisht, verbërisht vegël e një njeriu, Edi Ramës. Nga tempulli i demokracisë që duhet të jetë, nga institucioni ku opozita në emër të atyre që e kanë votuar, të 620 mijë shqiptarëve që e kanë votuar, duhet të paraqesë alternativën, por edhe të bëjë kontrollin e qeverisë.
Këto të dy funksione Edi Rama i asgjëson, duke shkelur kushtetutën dhe ligjet. Ligjet që ne paraqesim për votim, nuk sillen në parlament për shqyrtim. Komisionet Hetimore bllokohen, nuk lejohet. Kurrë ndonjëherë, kurrë ua them unë, as në 1991, parlamenti nuk ka qenë në këtë gjendje. Ndaj dhe mesazhi ynë ishte, parlamenti. Ai është parlamenti i krimit monstruoz kushtetues.
