PD: Vjedhja nuk ndalet. Zhduken 410 milionë lekë, Landfilli që inaguroi Rama në Mat nuk funksionon
Nga OraNews Përditësimi i fundit 24 Janar 2023, 11:18
Partia Demokratike denocoi këtë të martë një tjetër skandal me incineratorët, por tashmë në atë të Matit.
Nga foltorja e selisë blu, kryetarja e PD Mat, Denisa Vata theksoi se ndërsa vjedhja shtetërore nuk ndalet, janë plot 410 milionë lekë të zhdukura për një Landfill që nuk funksionon në Mat.
Vata deklaroi se impianti në fjalë u përurua nga vetë kryeministri Edi Rama tre muaj më parë.
“Landfilli i inauguruar tre muaj më parë nga Kryeministri Rama në Bashkinë Mat, ka pësuar fatin e “vëllezërve të mëdhenj” në Tiranë, Fier dhe Elbasan.
Edhe pse janë shpenzuar 410 milionë lekë nga taksat tuaja, gropa e hapur për landfill është ende bosh, ndërkohë që mbeturinat e bashkisë Mat shkarkohen diku ngjitur me Landfillin.
Siç do ta shihni nga pamjet, ky i ashtuquajtur Landfill është jashtë funksioni, pasi mbeturinat janë të hedhura në rrugë duke bllokuar madje dhe hyrjen për në gropën e depozitimit.
Gropa, në vend që të quhet ‘Landfill’ mund të emërtohet gropa e sebepit apo pretekstit për dikë në Bashkinë Mat për të çelur një tender, e mbyllur sytë, kur vidhen paratë e takspaguesve.
Landifilli nuk ka qenë në funksion asnjë ditë. Madje punonjësit deklarojnë, jashtë kamerave se nuk duan të humbasin punën dhe bukën e gojës, se është tentuar disa herë të groposen mbeturinat, por janë groposur makineritë e Bashkisë, për të cilat është dërguar më pas eskavatori për të bërë nxjerrjen e tyre.
Kjo vjen si pasojë e punimeve të dobëta dhe abuzive dhe mos hedhjes së bazamentit të dranazhimit. Mbulimi vetëm me skorje, mbi normativën e lejuar, nuk lejon makinat që të shkarkojnë.
Mosdranazhimi ka sjellë dhe shembjen e këtij Landfilli në anën e poshtme.
Pra, janë investuar 410 milion lek, dhe në vetëm pak muaj, Landfilli është jashtë funksionit dhe madje i shembur në anën e poshtme.
Se ku ka shkuar investimi, ku do shkojnë mbeturinat e Bashkisë Mat, dhe ku përfundojnë paratë, mund ta merrni me mend”, u shpreh kryetarja e PD-së në Mat, Denisa Vata.
