Rusia sulmon me dronë, Ukraina thotë se 15 ishin vetëshkatërrues dhe një zbulimi
Nga Ora News Përditësimi i fundit 30 Dhjetor 2022, 10:36
Ushtria ruse ka ashpërsuar sulmet në Ukrainë duke hedhur 16 dronë vetëm gjatë 24 orëve të fundit. 15 prej tyre ishin vetëshkatërrues ndërsa njëri bënte pjesë në kategorinë e zbuluesve. Autoritetet në Kiev thanë se shumica e dronëve u rrëzuan nga mbrojtja ajrore pa goditur objektivat ndërkohë synimi i ushtrisë ruse ka qenë dëmtimi i mëtejshëm i infrastrukturës së energjisë.
Rusia ka sulmuar ukrainën me 16 dronë "kamikazë", një ditë pasi Moska lëshoi dhjetëra raketa me objektiv infrastrukturën e Ukrainës.
Forcat Ajrore të Kievit thanë se të gjithë dronët, për të cilët tha se ishin dërguar nga juglindja dhe veriu, ishin shkatërruar nga mbrojtja ajrore.
Kryetari i bashkisë së Kievit, Vitali Klitschko tha në kanalin e tij Telegram se shtatë dronë ishin drejtuar në kryeqytet dhe se pesë u shkatërruan brenda qytetit ndërsa dy të tjerë u goditën para se të arrinin në Kiev.
Një ndërtesë administrative në qytet u shkatërrua pjesërisht, sipas kreut i administratës ushtarake të Kievit, i cili tha se nuk kishte informacion për viktima. Zyra e presidentit ukrainas Volodimir Zelenski ka publikuar pamjete dëmtimeve të shkaktuara nga rënia e dronit në ndërtesën administrative katërkatëshe në lagjen Goloseevsky të Kievit.
Ky sulm, sipas autoriteteve ka dëmtuar edhe një objekt banimi nëntëkatësh – ku janë thyer xhamat nga kati i 1 deri në të 5-të por fatmirësisht nuk ka pasur viktima.
Shtabi i Përgjithshëm i Forcave të Armatosura të Ukrainës tha se gjatë ditës së kaluar, Rusia lëshoi edhe 85 raketa dhe kreu 35 sulme ajrore, si bëri 63 granatime në territorin e betejës.
Ushtria e ukrainës, ka bërë me dije se nga dronët e lëshuar prej ushtrisë ruse në 24 orët e fundit, 15 kanë qenë vetëshkatërrues prodhim iranian, ndërsa një prej këtyre mjeteve ishte i kategorisë zbuluese dhe besohet se po përdorej nga ushtria ruse për fotografimin e situatës në front.
Nga mesi i tetorit Rusia ka nisur valë të shumta sulmesh me dronë dhe raketa kundër Ukrainës çka ka sjellë ndërprerje masive të energjisë në qytetet kryesore të vendit.
