“Katar 2022” çel siparin, për herë të parë në një vend arab dhe në dimër, sfida e parë Ekuador-Katar
Nga OraNews Përditësimi i fundit 20 Nëntor 2022, 17:03
Botërori i futbollit Katar 2022 do të çelë siparin me sfidën e Katar-Ekuador. Ndeshja do të nisë në orën 17: 00, ndërsa 7 do të jenë ndeshjet e dy ditëve pasuese.
Botërori i sportit më të ndjekur në planet do të zhvillohet në Katar, në vendin e parë arab dhe është hera e parë në historinë e këtij kompeticioni, që një turne zhvillohet në dimër.
Botërori i Katarit konsiderohet si një ndër më të shtrenjtë në histori. Me botën që sytë i ka nga Katari, ky i fundit po përpiqet që të bëjë “show” të vërtetë, nga mëngjesi deri në darkë. Qindra hotele dhe komplekse luksoze janë ndërtuar 12 vitet e fundit, pas lajmit se vendi arab kishte siguruar të drejtën për të organizuar Kupën e Botës 2022.
Nga 20 nëntori deri në 18 dhjetor, kur do të luhet finalja e madhe, vendi me më pak se 3 milionë banorë do të presë më shumë se 1.2 milionë vizitorë nga 32 vende të botës.
Ndeshja e parë e kompeticionit do të jetë ajo mes Ekuadorit dhe Katarit që do të luhet pasditen e sotme në orën 17:00, paraprirë nga një ceremoni hapëse që do të zgjasë për rreth një orë.
Sa i përket sfidave ditën e hënë do të luhen ndeshjet: Angli-Iran në orën 14, Senegal-Holandë në orë 17 dhe në orën 20 të mbrëmjes do të jetë përballja mes SHBA-së dhe Uellsit.
Të martën sipas kalendarit do të jenë 4 ndeshje, të cilat do të nisin në orën 11 me sfidën Argjentinë-Arabi Saudite, në 14 do të jetë përballja Danimarkë-Tunizi, në orën 17 Meksikë-Poloni, dhe në orën 20 Francë-Australi.
Institucioni më i lartë i futbollit FIFA ka vendosur që fituesi i trofeut të artë të marrë 40 milionë euro, ndërkohë që vendi i dytë do të fitojë 29 milionë euro ndërsa i treti 26 milionë euro.
Gjithashtu, FIFA ka vendosur të shpërndajë edhe më shumë se 200 milionë euro për klubet që kanë lojtarë në këtë kampionat.
32 kombëtaret e kualifikuara janë të ndara në 8 grupe me nga 4 skuadra.
GRUPI A: Ekuador, Holandë, Katar, Senegal
GRUPI B: Uells, Angli, Iran, Shtetet e Bashkuara
GRUP C: Arabia Saudite, Argjentina, Meksika, Polonia
GRUPI D: Australi, Danimarkë, Francë, Tunizi
GRUPI E: Kosta Rika, Gjermania, Japonia, Spanja
GRUPI F: Belgjikë, Kanada, Kroaci, Marok
GRUPI G: Brazil, Kamerun, Serbi, Zvicër
GRUPI H: Koreja e Jugut, Gana, Portugalia, Uruguai
