Rusia: Ukraina nuk do negociata, e ka ndryshuar pozicionin në lidhje me ne
Nga Amado Çela Përditësimi i fundit 17 Nëntor 2022, 15:11
Zërat pozitivë për një paqe të mundshme mes Rusisë dhe Kievit nuk kanë zgjatur më shumë se një javë. Moska akuzoi të enjten Ukrainën se po ndryshon objektivat dhe i kërkoi SHBA-ve që ta orientonin Kievin drejt diplomacisë.
Kremlini akuzoi të enjten Kievin për ndryshimin e objektivave në lidhje me bisedimet e mundshme të paqes.
Zëdhënësi i Kremlinit, Dmitry Peskov tha se Kremlini nuk mund të imagjinonte përfshirjen në negociata publike dhe i bëri thirrje Uashingtonit që ta shtyjë Kievin drejt diplomacisë.
Peskov tha se Shtetet e Bashkuara ishin të afta të merrnin parasysh shqetësimet e Rusisë dhe mund të inkurajonin Kievin që të kthehej në tryezën e bisedimeve nëse do të dëshironin.
Peskov tha gjithashtu se Ukraina kishte ndryshuar pozicionin e saj nëse donte të negocionte me Moskën disa herë gjatë konfliktit nëntë-mujor.
"Fillimisht ata negociojnë, pastaj refuzojnë të negociojnë, pastaj miratojnë një ligj që ndalon çdo lloj negociate, pastaj thonë se duan negociata, por ato të jenë publike. Prandaj është e vështirë të imagjinohen negociatat publike. Një gjë është e sigurt: ukrainasit nuk duan asnjë negociatë," tha ai.
Presidenti i Ukrainës, Zelenski më 15 nëntor u tha udhëheqësve botërorë se koha për t’i dhënë fund luftës së Rusisë në Ukrainë është tani.
