Glauk Konjufca në Lezhë: Skënderbeu, personazhi më i lavdishëm i historisë kombëtare!
Nga OraNews Përditësimi i fundit 21 Shtator 2022, 16:32
Një delegacion i kryesisë së Kuvendit të Kosovës i udhëhequr nga kryetari Glauk Konjufca, ka vizituar Lezhën. Konjufca nga vendvarrimi i heroit tonë, ka thënë se Skënderbeu është figura më e rëndësishme e kombit shqiptar, ndërsa Lidhja e Lezhës një ndër tre ngjarjet më madhështore të historisë.
Kryeparlamentari i Kosovës, Glauk Konjufca dhe një delegacion i kryesisë së Kuvendit atje, vizituan Lezhën këtë të mërkurë.
Nga vendvarrimi i Heroit Kombëtar Gjergj Kastrioti Skënderbeu, Konjufca vlerësoi figurën e heroit, ndërsa shtoi se Kuvendi i Lezhës është një ndër 3 ngjarjet kryesore të historisë së kombit tonë.
"Kuvendi i Lezhës është një nga tri ngjarjet më të rëndësishme të kombit tonë kurse personaliteti dhe figura e Gjergj Kastriotit Skëndërbeut padiskutim që është më e rëndësishmja historikisht për kombin shqiptar."
Por Kosovën dhe Shqipërinë, sipas Konjufcës, nuk i lidh vetëm e shkuara, por edhe e tashmja.
"Lezha është dhe një vend shumë i dashur turistik për popullin tonë, qytetarët tanë të cilët vijnë masivisht për të kaluar pushimet erës dhe gjejnë këtu një mikpritje, e cila i lidh edhe më shumë."
Delegacioni i Kuvendit të Kosovës po qëndron në vendin tonë prej dy ditësh, ndërsa më herët kanë zhvilluar takime me homologët e tyre shqiptarë në Kuvendin e Shqipërisë dhe kryetaren Lindita Nikolla.
