Charles në Buckingham, ai do të shpallet mbret nesër - Cilat do të jenë kompetencat e tij

Nga OraNews Përditësimi i fundit 9 Shtator 2022, 22:44

Charles III do të shpallet zyrtarisht mbret nesër, të shtunën, gjatë një takimi të Këshillit të Trashëgimisë në Londër, tha Buckingham Palace në një deklaratë.

Këshilli i Trashëgimisë do të mblidhet nesër në orën 10:00 (ora lokale) në Pallatin e Shën Jakobit dhe shpallja e Charles si mbret do të lexohet publikisht një orë më vonë nga jashtë asaj rezidence dhe më pas të nesërmen, në të gjitha provincat e Mbretërisë së Bashkuar.

Këmbanat e kishave ranë në të gjithë Mbretërinë e Bashkuar për nder të Mbretëreshës Elizabeth II,e cila vdiq në moshën 96-vjeçare pas 70 vitesh në fron.

Këmbanat e Katedrales së Shën Palit dhe Abacisë së Uestminsterit në Londër, si dhe ato të Kullës Windsor, filluan të binin ndërsa Mbreti i ri Charles III ishte rrugës për në Londër nga rezidenca e tij Balmoral në Skoci.

Kryeministrja britanike Liz Truss bëri homazhe për mbretëreshën e ndjerë sot në Parlament, duke përshëndetur "një nga udhëheqësit më të mëdhenj që ka njohur ndonjëherë bota" dhe "diplomaten më të madhe" të Mbretërisë së Bashkuar.

“Fjalët e saj të mençura na dhanë forcë në momentet më të vështira.Në momentet më të errëta të pandemisë na dha shpresë se do të takohemi sërish”, nënvizoi kryeministrja e veshur me të zeza, e cila do të pritet pasdite nga Mbreti Charles III.

Mbreti i ri Charles III mbërriti në Londër

Me statusin e tij të ri si mbret, Charles mbërriti në Londër për t'u transferuar në Buckingham Palace.

Në orët e para të pasdites ai u largua nga Kështjella Balmoral në Skoci ku i tha lamtumirë nënës së tij Mbretëreshës Elizabeth II.

Mbi 150,000 njerëz e panë Charles të zbarkonte në RAF Northolt.

Sipas faqes së internetit, 153,000 përdorues po shikonin fluturimin KRH20R kur ai u ul në bazën Northolt në orën 13:35 (ora lokale).

Fuqia e mbretit

Në Britani mbreti ka një rol kryesisht ceremonial dhe nuk pritet të ndërhyjë në çështjet politike. Megjithatë, si kreu i shtetit ai ruan disa kompetenca kushtetuese.

- Roli në Parlament

Parlamenti është autoriteti më i lartë legjislativ në Britani dhe përfshin Dhomën e Komunave, Dhomën e Lordëve dhe Kurorën, një tjetër term për monarkinë. Kurora është përbërësi më i vjetër i sistemit britanik të qeverisjes, por fuqitë e saj janë dobësuar me kalimin e kohës dhe sot janë kryesisht nderi.

- Formimi i Qeverisë

Një ditë pas zgjedhjeve të përgjithshme, monarku thërret liderin e partisë që fitoi më shumë vende në Dhomën e Komunave për të marrë postin e kryeministrit dhe për të formuar një qeveri.

- Fillimi i mandatit parlamentar ose shpërndarja e parlamentit

Monarku e shpall parlamentin të hapur çdo vit në një ceremoni të mbushur me traditë të quajtur Fjalimi nga Froni dhe vazhdon të lexojë planet e qeverisë për 12 muajt e ardhshëm. Kjo ngjarje e madhe vjetore zakonisht fillon me mbërritjen e monarkut në Ëestminster, në procesion nga Pallati Buckingham.Me kurorën perandorake,mbreti ose mbretëresha hyn në Dhomën e Lordëve. Zyrtari i parlamentit i njohur si “Black Rod” shkon më pas për t’u thirrur anëtarëve të Dhomës së Komunave, ku i përplasin në mënyrë simbolike derën në fytyrë, në shenjë pavarësie nga monarkia. Kurora shpërndan parlamentin me të njëjtin solemnitet përpara mbajtjes së zgjedhjeve të reja parlamentare.

- Pëlqimi mbretëror

Kur një projektligj miratohet nga Dhoma e Komunave dhe Dhoma e Lordëve, ai i dërgohet monarkut për t'u nënshkruar në ligj. Edhe pse mbreti mund të refuzojë të miratojë një projektligj, në të vërtetë është thjesht një formalitet.Monarku i fundit që refuzoi të jepte pëlqimin e saj ishte Mbretëresha Anne, në 1708.

- Besimi tek kryeministri

Mbretëresha Elizabeth II i priste kryeministrat një herë në javë, në një audiencë gjatë së cilës ata e informonin atë për planet dhe shqetësimet e tyre. Ky takim u mbajt gjithnjë e më shumë me telekonferencë në fund të mbretërimit të saj.

"Ata më thonë se çfarë po ndodh ose nëse kanë probleme, dhe ndonjëherë mund t'i ndihmoj në një mënyrë ose në një tjetër," tha mbretëresha e ndjerë në një dokumentar të transmetuar në vitin 1992, duke vënë në dukje se "ata e dinë që unë mund të jem e paanshme".

- Dhënia e titujve

Monarku ka fuqinë të emërojë Lordët në parlament, por ky pushtet ushtrohet vetëm me këshillën e ministrave të qeverisë. Mbreti gjithashtu i jep personalisht titullin kalorës, duke nderuar ata që kanë dhënë një kontribut të rëndësishëm në shoqërinë britanike, në të gjitha fushat. Qeveria i paraqet monarkut çdo vit një listë të kandidatëve.

- Krizat kushtetuese

Monarku ka fuqinë për të ushtruar prerogativat e tij mbretërore "në rast të një krize serioze kushtetuese".

Ai është i autorizuar të mos pajtohet me mendimin e ministrave, por kjo nuk ka ndodhur kurrë në kohët moderne.

- Kreu i Kishës Anglikane

Si kreu i Kishës së Anglisë, mbreti ka fuqinë të emërojë peshkopë dhe kryepeshkopë, por edhe atëherë, ky pushtet ushtrohet sipas mendimit të një komiteti kishtar.