S’ka marrëveshje Kosovë -Serbi/ DASH: Mos ndërprisni dialogun, SHBA po ndjek nga afër situatën

Nga OraNews Përditësimi i fundit 19 Gusht 2022, 11:53

Kosova dhe Serbia dështuan sërish në tryezën e dialogut për të gjetur zgjidhje mbi problemet që u diskutuan në Bruksel. Në takimin e tretë mes tyre, Vuçiç dhe Kurti kanë qëndrime të kundërta për normalizimin e marrëdhënieve mes vendeve, ndërsa për Bashkimin Europian ky raund nuk mund të konsiderohet i mbyllur. Nga ana tjetër Shtetet e Bashkuara kanë inkurajuar palët që të vijojnë me dialogun, duke siguruar se kjo çështje po ndiqet nga afër në Uashington.

S’ka marrëveshje Kosovë -Serbi/ DASH: Mos ndërprisni

Një ditë pas dështimit të dialogut mes Kosovës dhe Serbisë, Shtetet e Bashkuara i bëjnë thirrje autoriteteve të dy vendeve që të vazhdojnë negociatat. Përmes zëdhënësit të Departamentit të Shtetit, SHBA thotë se është duke e vëzhguar nga afër situatën.

“Nga ajo që dimë është se bisedimet po vazhdojnë. Ne, në partneritet me BE-në po e ndjekim me kujdes dhe inkurajojmë të dyja palët që të shfrytëzojnë dialogun në mënyrë efektive dhe u sugjerojmë palëve që të vazhdojnë dialogun”, tha zëdhënësi i Departamentit, Ned Price.

Ai shtoi se SHBA është e kënaqur që këto diskutime kanë filluar dhe po vazhdojnë edhe tani. Edhe pse në Bruksel e kanë cilësuar si një diskutim të mirë, dialogu mes Kurtit dhe Vuçiç, me ndërmjetësimin e Shefit për Politikë të Jashtme në BE, mund të cilësohet i dështuar sa i përket rezultatit që prodhoi.

"Për dy prej çështjeve më të rëndësishme, të cilat stimualuan edhe tensione në Veri të Kosovës, palët nuk u dakordësuan. Ato kanë të bëjnë me targat dhe dokumentet e udhëtimit. Ne nuk arritëm marrëveshje, por s’është fundi i tregimit, dy liderët u pajtuan se procesi duhet të vazhdojë dhe diskutimi do të rikthehet në ditët e ardhshme dhe ka kohë deri më 1 shtator”, tha ai kryediplomati i BE-së.

Për Bashkimin Europian raundi i tretë i nivelit të lartë të dialogut Prishtinë-Beograd nuk ka mbaruar dhe nuk quhet i mbyllur. Bashkimi Europian pritet të komunikojë në ditët në vijim për qëndrimin e delegacioneve të Kosovës dhe Serbisë.

Progres është arritur për gjetjen e personave te zhdukur, dhe për energjinë, për të cilat palët janë shumë pranë arritjes së zbatimit të udhërrëfyesit. Mbeten pezull çështja e asociacionit, e njohjes se ndërsjellë të dokumenteve dhe targave te automjeteve.