Zambaku gjigand, mrekullia botanike/ Bima e zhdukur prej më shumë se një shekulli zbulohet në Londër
Nga Besmira Pelushaj Përditësimi i fundit 4 Korrik 2022, 12:44
Një ekip ekspertësh të botanikës në Britaninë e Madhe bashkë me kolegë nga Bolivia kanë zbuluar llojet e para gjigante të zambakëve të ujit që nga mesi i shekullit të 19-të. Mostrat e specieve të reja kishin mbetur të pazbuluara në “Kew Gardens” të Londrës për 177 vjet dhe në kopshtin botanik të Bolivisë për 34 vjet.
Mendohej se ishin nga "Victoria amazonica", një nga dy varietetet e njohura të zambakëve gjigantë të ujit, gjinia e të cilëve u emërua pas mbretëreshës Victoria në 1852. Por identiteti i tyre i vërtetë u zbulua pasi ekspertët në Kew punuan me një ekip nga vendi i Amerikës Latine për të përcaktuar se ata ishin në fakt një varietet i tretë.
Botanistja Lucy Smith tha se ata ishin rritur të paetiketuar në një serë në Kew për katër vitet e fundit.
"Disa njerëz kanë pyetur, pse kjo bimë duket kaq e ndryshme nga të tjerët? Në fakt, ne e kemi pasur këtë sekret të mrekullueshëm të fshehur gjatë gjithë kësaj kohe këtu mes nesh."
Përveçse është lloji më i ri i zambakëve gjigantë të ujit, "Victoria boliviana", gjethet e të cilit rriten deri në tre metra në natyrë, është gjithashtu më i madhi në botë. Farërat nga speciet e treta gjigante të zambakut të ujit u dhuruan nga Kopshti Botanik në Bolivi, dhe u rrit duke përdorur teknologjinë molekulare nëpërmjet ndarjes së ADN-së.
Carlos Magdalena, një hulumtues i specializuar në shpëtimin e bimëve që janë afër zhdukjes, e përshkroi atë si "një nga mrekullitë botanike të botës".
"Kjo është mjaft e pazakontë dhe nxjerr në pah se sa pak dimë për botën tonë natyrore."
Zambakët gjigantë lulëzojnë dhe kthehen nga e bardha në rozë gjatë natës. "Victoria boliviana" është emëruar për nder të partnerëve bolivianë në ekip.
