U bllokoi llogaritë bankare familjarëve të kreditorit që ndërroi jetë, arrestohet përmbaruesi, dy kolegë të tij në hetim

Nga OraNews Përditësimi i fundit 15 Prill 2022, 09:18

Policia e Tiranës ka arrestuar për herë të dytë përmbaruesin privat, Fatos Alimadhi. Kësaj here ai akuzohet për bllokimin e parregullt të llogarive të një kredimarrësi pas vdekjes, ndërkohë që në vitin 2018 ai ishte akuzuar për përfitimin e 32 mijë eurove nga një klient tjetër.

Përmbaruesi privat, Fatos Alimadhi, është arrestuar nga policia e Tiranës me akuzën e shpërdorimit të detyrës pasi i ka bllokuar paratë në bankë një klienti pasi kishte ndërruar jetë.

Burimet zyrtare thanë se gjatë operacionit të koduar me emrin  “Acount” është vënë në pranga 54-vjeçari, i cili akuzohet se ka kryer veprën penale shpërdorim detyre.

Konkretisht, Fatos Alimadhi dyshohet se ka abuzuar në rastin e një klienti të tij që kishte marrë kredi në emër të një subjekti, dhe pas disa kohësh ka ndërruar jetë.

KETU LAJMET MINUTE PAS MINUTE

Pavarësisht se kredinë ka vazhduar ta mbulojë sigurimi i jetës së qytetarit pas vdekjes, përmbaruesi privat Fatos Alimadhi i bllokonte llogaritë familjarëve të të ndjerit pa i lajmëruar ata.

Konkretisht policia tha se përmbaruesi ka firmosur shkresa dhe vendime për sekuestro për bllokimin e llogarive rrjedhëse.

Pasi janë vënë në dijeni të këtyre fakteve, të afërmit e personit që kishte ndërruar jetë kanë bërë padi në polici ndaj përmbaruesit, duke kërkuar hetimin e tij.

Në kuadër të këtij operacioni, u proceduan penalisht në gjendje të lirë edhe dy kolegë të Alimadhit me iniciale S. D., dhe P. Q., të akuzuar për veprën penale "Shpërdorimi i detyrës".

Në vitin 2018 përmbaresi privat Fatos Alimadhi është arrestuar edhe njëherë tjetër për vjedhjen e 32 mijë eurove të një klienti të tij.

Konkretisht në atë vit, përmbaruesi kishte kryer shitjen në ankand të një apartamenti të bllokuar për shkak të mos-shlyerjes së kredisë.

Vlera me të cilën është shitur prona sipas policisë, ka sjellë një përfitim prej 32 mijë eurosh për përmbaruesin, i cili është proceduar për vjedhje duke shpërdoruar detyrën.