Në përgjigje të sanksioneve, Medvedev paralajmëron për katastrofë bërthamore
Nga OraNews Përditësimi i fundit 23 Mars 2022, 18:41
Nënkryetari i Këshillit të Sigurimit të Rusisë, Dmitry Medvedev, ka paralajmëruar se SHBA-të po shkojnë drejt një katastrofe bërthamore për botën nëse vazhdojnë atë që ai e ka quajtur një komplot për të shkatërruar Rusinë.
"Që nga fundi i Bashkimit Sovjetik në 1991, SHBA ka komplotuar për të shkatërruar Rusinë si pjesë e një "lojë primitive". Kjo do të thotë se Rusia duhet të poshtërohet, kufizohet, shtypet, ndahet dhe shkatërrohet”, thuhej në deklaratën e Medvedev të mërkurën.
56-vjeçari ishte kreu i shtetit nga viti 2008 deri në vitin 2012 dhe është një nga njerëzit më të besuar të presidentit Vladimir Putin.
Medvedev dikur konsiderohej si një nga njerëzit më të rezervuar në rrethinën e Putinit.
Deklaratat e tij japin një pasqyrë të mendësisë së udhëheqjes ruse në mes të krizës më të keqe midis Rusisë dhe Perëndimit që nga kriza e raketave Kubane në vitin 1962.
Udhëheqja në Moskë e përshkruan pushtimin e saj në Ukrainë, i cili filloi më 24 shkurt, si një operacion special ushtarak për çmilitarizimin dhe denazifikimin e vendit fqinj dhe mbrojtjen e popullatës rusisht-folëse nga gjenocidi.
Qeveria në Kiev i ka hedhur poshtë akuzat si të pakuptimta dhe, ashtu si Perëndimi, po flet për një luftë agresioni.
Udhëheqja në Moskë nuk do të lejojë kurrë shkatërrimin e Rusisë, deklaroi Medvedev.
Nëse SHBA-ja arrin qëllimet e saj, bota mund të përballet me një krizë distopike që do të rezultonte në një "shpërthim të madh bërthamor".
Medvedev pikturoi gjithashtu një tablo të një bote pas Putinit që do të pasonte rënien e Rusisë.
"Shkatërrimi i vendit më të madh në tokë mund të rezultojë në një udhëheqje të paqëndrueshme në Moskë, e cila ka një numër maksimal të armëve bërthamore që synojnë objektivat në Shtetet e Bashkuara dhe Evropë. Rënia e Rusisë do të rezultonte në shfaqjen e pesë ose gjashtë shteteve në tokën euroaziatike që do të zotëronin armë bërthamore dhe do të qeveriseshin nga "të çuditshëm, fanatikë dhe radikalë". A është kjo një distopi apo një parashikim i çmendur futurist? A është trillim? Jo."
