Fluturimet në aeroportin e Stambollit shtyhen deri në orën 13.00 për shkak të reshjeve të borës
Nga OraNews Përditësimi i fundit 25 Janar 2022, 08:20
Për shkak të reshjeve të borës në Stamboll, të cilat kanë shtuar intensitetin që prej mbrëmjes së djeshme, uljet dhe ngritjet e avionëve në aeroportin e Stambollit janë shtyrë deri në orën 13.00 të ditës së sotme, 25 janar.
16 avionë të Turkish Airlines u devijuan drejt aeroporteve të tjera. Mes avionëve të bllokuar është edhe ai i Air Albania, që fluturon drejt Tiranës.
Pasagjerët që nuk mund të dalin nga aeroporti për shkak të mbylljes së rrugëve për në aeroport e kaluan natën duke fjetur në stolat e terminalit dhe në hapësirat boshe që gjejnë.
Një nga pasagjerët deklaroi se do të udhëtonte drejt Brukselit të Belgjikës, por fluturimi u anulua për shkak të motit të keq.
"Kam qëndruar një javë në Stamboll. Erdha të marr avionin. Jam në aeroport që në orën 12:00 të mesditës.Si fillim na thanë se ka vonesa pastaj mësuam me email se fluturimi ishte anuluar. Na thanë se do të sistemoheshim në hotel por u bllokuam në aeroport për shkak të borës."
