Pa energji pas stuhive, banorët e Klosit ankohen për rrjetin shpërndarës të energjisë
Nga Spartak Doçi Përditësimi i fundit 26 Dhjetor 2021, 15:21
Furnizimi me energji elektrike mbetet një prej problematikave me të cilat përballen banorët e zonave të thella në qarkun e Dibrës gjatë muajve të dimrit.
Prefekti i Dibrës e quan të drejtë shqetësimin dhe thekson nevojën e investimeve në rrjetin shpërndarës.
Banorët e fshatrave të Klosit ankohen për probleme me furnizimin me energji kryesisht gjatë stinës së dimrit.
Shkak sipas tyre bëhet rrjeti i amortizuar i shpërndarjes dhe nënstacioni i Suçit ku sipas tyre investimet e fundit janë bërë 4 dekada më parë.
Duke theksuar se detyrimet i paguajnë në rregull, kërkojnë zgjidhjen e problematikës së furnizimit me energji.
Në të kundërt paralajmërojnë protesta.
Situatën në fshatrat e Klosit e pranon edhe prefekti i Dibrës i cili thekson nevojën e ndërhyrjeve në rrjetin shpërndarës.
Stuhia e borës dhe shiut e fillim dhjetorit la në terr për disa ditë banorët e zonave të thella në të gjithë vendin, duke nxjerrë në pah rrjetin e vjetruar të shpërndarjes së energjisë elektrike.
