Vonesa me lëvizjet e trageteve në Durrës. Në Vlorë pezullohet lundrimi
Nga OraNews Përditësimi i fundit 9 Dhjetor 2021, 09:31
Moti me stuhi e erë të fortë ka shkaktuar vonesa të lëvizjes së trageteve. Në portin e Durrësit, trageti “Golden Bridge” i parashikuar për t’u nisur mbrëmjen e djeshme rreth orës 23:00, ka lënë portin e Durrësit rreth orës 02:00 të kësaj të enjteje (9 dhjetor).
“Rigel III” i parashikuar po ashtu për t’u nisur në orën 23:00 nuk është nisur fare. Ndërkaq, në portin e Durrësit nuk është ankoruar ende asnjë traget që vjen nga Bari.
Burime nga kapiteneria bëjnë me dije se moti i keq në shtetin fqinj ka shkaktuar vonesa për lundrimin e trageteve të linjës Bari-Durrës.
“Rigel VII” dhe “Af Francesca” duhej të kishin mbërritur në portin e Durrësit në orën 08:00 të kësaj të enjteje, por kapiteneria bën me dije se do mund të bregëzohen në port në mesditë, rreth orës 13:00.
Edhe Kapiteneria e Vlorës nën varsi të kushteve meterologjike njofton sërish pezullimin e lundrimit detar për mjetet e vogla lundruese si dhe mjetet e peshkimit.
Eshtë ndaluar dhënia e leje-nisjes e të gjitha mjeteve të vogla lundruese , anijeve të peshkimit që operojnë jashtë Gjirit të Vlorës dhe marjen e masave për sigurimin e tyre.
Për shkak te kushteve hidrometeorologjike te perkeqesuara, trageti i linjës Vlorë- Brindisi- Vlore ka mbërritur në portin e Vlorës por nuk është akostuar, qëndron në radë. Me përmisimin e kushteve hidrometeorologjike do te akostohet për të shkarkuar pasagjeret dhe automjetet.
Përmisimi i situatës meteorologjike të përkeqësuar në gjirin e Vlorës dhe jashtë saj për mjetet e vogla lundruese dhe të peshkimit do të jetë mbas datës 09.12.2021 ora 14:00.
