Gjermania pak orë para zgjedhjeve, nesër do të votojnë 60 mln qytetarë

Nga OraNews Përditësimi i fundit 25 Shtator 2021, 15:06

Gjermania është pak orë larg zgjedhjes së qeverisë së re, të ndarë mes konservatorëve dhe socialistëve.

Të shtunën, partitë përmbyllën tubimet e tyre elektorale.

Kancelarja Angela Merkel u shfaq përsëri krah pasardhësit politik, Armin Lashet, duke e prezantuar si personin më të denjë për t'i besuar të ardhmen e vendit dhe të shoqërisë gjermane.

Për javë me radhë 60-vjeçari renditej mbrapa rivalit socialdemokrat, Olaf Sholc, por një sondazh i fundit tregon se diferenca është ngushtuar.

Të gjelbrit e Analena Berbokut mbeten të tretët për nga pëlqimi popullor.

Kancelarja Merkel e drejton kancelarinë gjermane prej 16 vitesh, dhe blloku i saj CDU-CSU mund të fitojë sërish.

Një triumf i SPD-së mund të rikthejë në pushtet socialdemokratët dhe ambientalistët, po ashtu pas 16 viteve.

Opsion mbetet edhe vazhdimi i modelit aktual të qeverisjes sipas konceptit të koalicionit të gjerë, CDU-CSU dhe SPD.

Gjermania është ekonomi e madhe europiane me ndikim politik në tërë Bashkimit Europian dhe në botë.

Të dielën votohet për 598 anëtarët e Bundestagut apo për dhomën e ulët të parlamentit dhe në zgjedhje janë ftuar të marrin pjesë 60 milionë gjermanë.