Për të mbrojtur "dinjitetin" e Mbretëreshës, testamenti i princit Filip do mbahet sekret për 90 vite
Nga Besmira Pelushaj Përditësimi i fundit 17 Shtator 2021, 14:16
Testamenti i Dukës së Edinburgut do të mbetet sekret për të paktën 90 vjet për të mbrojtur "dinjitetin dhe pozitën" e Mbretëreshës. Vendimi është marrë nga Gjykata e Lartë, në bazë të një konvente 1 shekullore, që sanksionon se pas vdekjes së një anëtari të lartë të Familjes Mbretërore, gjykatave u kërkohet të vulosin vullnetin e tyre.
"Ekziston një nevojë për të rritur mbrojtjen që u jepet aspekteve vërtet private të jetës së këtij grupi të kufizuar individësh, në mënyrë që të ruhet dinjiteti i Sovranit dhe anëtarëve të ngushtë të familjes së saj," tha gjykatësi Sir Andrew.
Ai është kujdestari i një kasaforte që përmban më shumë se 30 zarfa, secila përmban testamentin e vulosur të një anëtari të vdekur të Familjes Mbretërore.
Gjykatësi tha se ai nuk e kishte parë testamentin e Princit Filip dhe se nuk dinte asgjë për përmbajtjen e tij, përveç datës së ekzekutimit. Ai tha se vendosi ta mbante seancën në mënyrë private, sepse çështja ka të ngjarë të krijojë spekulime në media, për shkak të kuriozitetit publik.
Duke detajuar historinë e vendimeve të mëparshme, Sir Andrew tha se anëtari i parë i familjes, testamenti i të cilit u vulos nga gjykata ishte Princi Francis i Teck, vëllai më i vogël i Mbretëreshës Mary, i cili vdiq në 1910. Sipas ekspertit mbretëror Michael L Nash, mekanizmi ligjor u krijua pasi Princi Francis i la smeraldet e çmuara të Mbretëreshës Mari zonjës së tij, Konteshës së Kilmorey.
Në kasafortën e gjykatësit Sir Andrew qëndron testamenti i Nënës Mbretëreshë dhe Princeshës Margaret, motrës së Elisabetës së II, e cila vdiq në 2002.
