Dasmat kthejnë koronavirusin në Kukës e Has, shtohen infektimet
Nga OraNews Përditësimi i fundit 23 Korrik 2021, 12:35
Kukësi është një nga qarqet me numrin më të ulët të vdekjeve nga Covid në vend, ndërsa pas gati dy muajsh pa asnjë rast pozitiv, infeksionet janë rritur ditët e fundit. Ekspertët thonë se kjo situatë është krijuar nga ardhja e emigrantëve, sezoni i dasmave por edhe interesi i ulët i popullatës për vaksinimin.
Infektimet nga koronavirusi po shtohen në qarkun e Kukësit pas pothuajse dy muajsh pa asnjë rast. Më shqetësuese është gjendja në Has, ku vetëm dy ditët e fundit janë identifikuar 11 raste të reja infektimesh me koronavirus.
Hasan Halilaj Drejtor i Njësisë Vendorë të Kujdesit Shëndetësor Kukës, thotë se kthimi i emigrantëve pranë familjeve, dasmat dhe grumbullimet mund të jenë shkak për përhapjen e koronavirusit.
"Kohët e fundit kemi shumë emigrantë që vijnë të takojnë familjet e tyre. Duhet të jemi të vëmendshëm ndaj këtij fenomeni. Por është dhe problemi i dasmave dhe i tubimeve familjare, se ne mos të harrojmë që Covid-19 është i pranishëm dhe në Kukës tashmë."
Halilaj tha se po punohet për sensibilizimin e banorëve për t’iu nënshtruar procesit të vaksinimit si e vetmja mundësi e mbrojtjes por edhe parandalimit për përhapjen e Covid-19, ndërsa tregon efektivitetin e vaksinave që po aplikohen në vendin tonë.
"Brenda një familjeje, 1 person që ka bërë vaksinën nuk ka dalë pozitiv, por dy anëtarët e familjes kanë dalë pozitiv. Kjo tregon se vaksina është e domosdoshme dhe nuk do të bëhet asnjë lloj tolerimi në këtë pjesë."
Rënien e interesit qytetar e lidh me mungesën e ndërgjegjësimit për t’u vaksinuar duke theksuar se nuk jemi në luksin e përzgjedhjes së llojit të vaksinës.
Sipas Ministrisë së Shëndetësisë në vendin tonë aktualisht janë aktivë 232 persona me koronavirus ndërsa qarku i Kukësit është i katërti me 21 raste aktive. Që nga shfaqja e pandemisë në Kukës, Has e Tropojë kanë humbur jetën 34 persona.
