Australi/ Varianti Delta i koronavirusit, rikthehen kufizimet në Sidney
Nga OraNews Përditësimi i fundit 26 Qershor 2021, 14:08
Australia po ndërmerr masa ekstreme për t’u përballur me variantin Delta të koronavirusiut. I gjithë qyteti i Sidneit dhe rrethinat e tij janë kufizuar për dy javë për shkak të progresit të variantit të ri të virusit vdekjeprurës.
Pas dekretimit të premten të kufizimit te katër rrethinat e qendrës së Sidneit, autoritetet vendosën sot të zgjerojnë, për dy javë, masat në të gjithë metropolin, më i madhi në Australi me më shumë se pesë milionë banorë.
Në vend, i cili deri më tani ka përmbajtur mjaft mirë përhapjen e Covid-19, më shumë se 80 persona kanë rezultuar pozitivë këtë javë, të gjithë të lidhur me një shofer që drejtonte ekuipazhet e kompanive ajrore nga aeroporti i Sidneit deri në hotelet e karantinës.
Varianti Delta i koronavirusit rezulton se është 60% më i transmetueshëm se paraardhësi i tij.
Ai u shfaq për herë të parë në Dhjetor të 2020-s, në shtetin indian të Maharashtras, dhe nuk dukej aq shqetësues. Por kur u përhap në New Delhi disa muaj më vonë, ndikimi i tij ishte shkatërrues, me gati 30 mijë raste të raportuara çdo ditë deri në fund të prillit.
Nga New Delhi, varianti është përhapur shpejt dhe tani duket se do të përfshijë globin në atë që mund të shndërrohet në një valë të re shkatërruese.
Në Mbretërinë e Bashkuar, variant Delta tashmë përbën më shumë se 90% të të gjitha infektimeve.
