Armë dhe vazo me kanabis në banesën afër poligonit, arrestohen babë e bir në Laç
Nga OraNews Përditësimi i fundit 7 Maj 2021, 09:17
Babë e bir si dhe shoku i këtij të fundit janë arrestuar në Laç për armëmbajtje pa leje dhe kultivim të bimëve narkotike.
Në pranga kanë rënë V. R., 48 vjeç, V. R., 17 vjeç (babë dhe bir), banues në Kurbin dhe A. L., 17 vjeç, banues në Fushë Krujë (shok i 17-vjecarit V. R).
"Në vijim të kontrollit masiv të territorit, me qëllim parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, bazuar dhe në informacionet e marra në rrugë operative së në Laç, Kurbin, në një banesë në afërsi të një poligoni kishte armë zjarri dhe i zoti i banesës kishte kultivuar kanabis në vazo lulesh, u organizua dhe u finalizua operacioni policor i koduar "Poligoni", në kuadër të të cilit u bë kapja dhe arrestimi i këtyre shtetasve".
Gjatë kontrollit të ushtruar nga shërbimet e Policisë, në oborrin e banesës së shtetasit V. R., në Laç, u gjetën të kultivuar në vazo lulesh, disa fidanë të dyshuar narkotikë cannabis sativa.
Gjithashtu, gjatë operacionit Policia ka gjetur dhe sekuestruar brenda banesës së shtetasit të lartpërmendur, një armë zjarri automatik, një armë zjarri pistoletë dhe municion luftarak.
Materialet hetimore u referuan në Prokurorinë e Rrethit Gjyqësor Kurbin, për veprime të mëtejshme, për veprat penale "Armëmbajtja pa leje" dhe "Kultivimi i bimëve narkotike”, kryer në bashkëpunim.
