Miratohet marrëveshja Post-Brexit, bashkëpunimi tregtar mes Anglisë dhe BE do të vazhdojë
Nga OraNews Përditësimi i fundit 28 Prill 2021, 14:42
Parlamenti Europian do të vazhdojë të zhvillojë në të ardhmen tregti të lirë me Britaninë, edhe pas largimit të saj nga unioni i përbashkët.
Marrëveshja post-Brexit u votua nga 660 eurodeputetë, 5 kundër dhe 32 abstenuan.
Ajo garanton lëvizje të lirë për shumicën e mallrave të prodhuara në dy anët e kufirit, por është më kufizuese për sa i përket sektorit të shërbimeve dhe standardeve që duhet të përmbushin eksportet britanike drejt BE-së.
"Votimi i sotëm është hapi i fundit, por edhe fillimi i një kapitulli të ri. Mund ta shohim atë si pikën kulmore të raporteve tona për dekadat që vijnë, ose si themelin e një partneriteti të fortë që bazohet mbi vlera dhe interesa të përbashkëta," tha presidentja e Komisionit, Ursula von der Leyen.
Edhe kryeministri britanik, Boris Xhonson, e përshëndeti votimin në Bruksel, duke shtuar se "pakti tregtar i jep stabilitet marrëdhënies së re me BE-në, dy partnerëve jetikë tregtarë, aleatëve të ngushtë dhe sovranë."
Britania u largua nga Bashkimi Europian janarin e kaluar në bazë të referendumit të vitit 2016.
Largimi mësohet se është shoqëruar me një ulje të ndjeshme të shkëmbimeve ekonomike dhe vazhdojnë tensionet mes palëve në lidhje me lëvizjen e lirë të personave, të drejtat e peshkimit në ujërat britanikë dhe pozitat e Irlandës Veriore, provincës angleze që tani i nënshtrohet rregullave doganore të BE-së.
