SHBA heq dorë nga pezullimi i vaksinës Johnson & Johnson

Nga OraNews Përditësimi i fundit 24 Prill 2021, 08:53

Pas 11 ditësh pezullim, rregullatorë shëndetësorë amerikanë kanë hequr dorë nga pezullimi i vaksinës Johnson & Johnson, por do ta bëjnë me një etiketë paralajmëruese rreth potencialet për mpiksje jashtëzakonisht të rralla të gjakut.

Pesëmbëdhjetë persona që morën vaksinën vuajtën nga një mpiksje e rrezikshme gjaku.

Këtë javë, rregullatori i vaksinës në Evropë gjithashtu hoqi kufizimet në vaksinën J&J.

Rregullatorët evropianë këtë muaj gjithashtu thanë se kishte mpiksje të ngjashme, shumë të pazakontë të gjakut me vaksinën AstraZeneca Covid-19, por gjetën se përfitimet e ilaçit tejkalonin çdo rrezik.

Të premten pasdite, më 23 prill CDC dhe Administrata e Ushqimit dhe Barnave ndoqën me shpejtësi rekomandimin e panelit këshillues CDC pasi votoi 10-4 për të vazhduar përdorimin e vaksinës për njerëzit 18 vjeç dhe më të vjetër në përputhje me autorizimin e tij origjinal.

Vendimi do të thotë që të paktën 10 milion doza të vaksinës J&J, të dërguara nga fabrika e kompanisë në Hollandë, mund të shpërndahen menjëherë në SHBA.

Zyrtarët shëndetësorë të premten identifikuan nëntë raste të tjera të mpiksjes së gjakut, duke shtuar gjashtë raste të identifikuara tashmë që kur rregullatorët miratuan për herë të parë vaksinën si të sigurt dhe efektive në shkurt.

Të gjitha ishin gra, shumica nën moshën 50 vjeç. Tre vdiqën dhe shtatë u shtruan në spital.

Zyrtarët e CDC që paraqitën të dhënat të premten thanë se po shqyrtoheshin edhe disa raste të mpiksjes së gjakut tek burrat.

Zyrtarët gjithashtu thanë se ishte e rëndësishme që grave t'u flitej për rreziqet e mundshme të vaksinës, në mënyrë që ato të vendosnin nëse do të kërkonin alternativa.

Dr Sarah Long, nga Kolegji i Mjekësisë i Universitetit Drexel, ishte në mesin e anëtarëve të panelit që votuan kundër propozimit sepse mendoi se nuk shkoi aq larg sa të paralajmëronte gratë.

"Kjo është një grupmoshë që është më e rrezikuar nga mpiksja e gjakut që po merr vaksinë kryesisht për të shpëtuar jetën dhe infektimin e njërëzve të tjerë, jo të tyre," i tha ajo agjencisë AP.

"Dhe unë mendoj se ne kemi një përgjegjësi të jemi të sigurt se ata e dinë këtë."

Simptomat mund të lindin brenda tre javësh nga vaksinimi dhe përfshijnë dhimbje koke akute, gulçim dhe dhimbje në këmbë dhe bark.

Zyrtarët shëndetësorë amerikanë po paralajmërojnë mjekët se heparina, një trajtim i zakonshëm për mpiksjen e gjakut, mund të përkeqësojë gjendjen e lidhur me vaksinën.