Përplasen dy trena, të paktën 30 viktima
Nga OraNews Përditësimi i fundit 26 Mars 2021, 15:08
Një aksident hekurudhor në qytetin qendror të Sohagut në Egjipt shkaktoi të premten të paktën 30 viktima dhe mbi 100 të plagosur.
Autoritetet egjiptiane raportuan se aksidenti erdhi si pasojë e përplasjes së dy trenave.
Rreth orës 11:42 të paradites, njëri nga mjetet aktivizoi frenin e emergjencës përpara se të goditej nga mbrapa nga mjeti tjetër.
Përplasja deformoi dy vagonët e fundit me pasagjerë dhe nxori nga shinat një të tretë.
Me ndërhyrjen e pasagjerëve dhe ekipeve të shpëtimit, u bë e mundur nxjerrja e viktimave.
Presidenti egjiptian premtoi dënimin e personit që dyshohet se aktivizoi papritur frenat e trenit.
"Kushdo që e shkaktoi këtë aksident të dhimbshëm, me neglizhencë, korrupsioni apo diçka të ngjashme, duhet të marrë pa përjashtim dhe vonesë dënimin më të ashpër."
Infrastruktura hekurudhore e Egjiptit është ndër më të vjetrat e Afrikës Veriore dhe përgjatë viteve është bërë shkak për aksidente fatale.
Më i rëndi konsiderohet aksidenti i vitit 2002, që la mbi 370 pasagjerë të vrarë pasi treni me të cilin ishin nisur mori flakë gjatë udhëtimit.
