Paralajmërimi i diplomatit palestinez: Kosova do të ndëshkohet për hapjen e Ambasadës në Jeruzalem
Nga OraNews Përditësimi i fundit 15 Mars 2021, 15:10
Ambasadori i Palestinës në Beograd, Mohamed Nabhan, ka thënë se Kosova me vendimin për të hapur Amasadën në Jeruzalem ka shkelur të drejtat e popullit palestinez.
“Është një sulm ndaj të drejtave tona dhe njerëzve tanë. Kosova kështu po i shkel të drejtat e popullit palestinez për shtetin dhe kryeqytetin e saj. Prishtina po shkel po ashtu të drejtën ndërkombëtare, sepse Jerusalemi është okupuar nga Izraeli që nga viti 1967, dhe që një vend të bëhet anëtar i organizatave ndërkombëtare dhe Kombeve të Bashkuara, duhet t’i përmbahet të drejtës ndërkombëtare”- ka thënë Nebahan në intervistë për “Kosovo Online”.
“Sigurisht se unë jam në konsultim me Ministrinë e Punëve të Jashtme të Palestinës dhe duke filluar nga sot, ne do të ndërmarrim hapa që nuk do t’i pëlqejnë Kosovës, në nivelin e Ligës Arabe dhe Bashkëpunimit Islamik. Kosova nuk është anëtare e asnjërës prej këtyre organizatave, por shumë prej tyre e kanë pranuar të ashtuquajturën Kosovë, dhe do të kërkojmë nga ato vende që tash ta shqyrtojnë vendimin e tyre për pranimin e Kosovës”- shton ai.
Sjellim në vëmendje që reagime të ashpra kundër hapjes së ambasadës së Kosovës në Jeruzalem pati edhe nga Turqia.
